Ynne ka sngi u MLA ka Mowkaiaw, u Nujorki Sungoh da wai u ya ka Police Outpost ha ka chnong Barato hei emlang u MDC u Aiborlang Shadap, u DC ka West Jaiñtia Hills u BS Sohliya, u SP ka District u BD Marak wa kiwi kiwi.
Ya kani ka yalang ynne da pynlai da ka DSP ka District, ka CW Lyngdoh wei da yoh ya ki kyntien pdiang burom na u Nihun Sten uwa man u waheh chnong ka Barato.
U BD Marak hawa e yei klam da ong u wa kani ka Outpost daw wanrah ko i chakri rap chajan cha ki paidbah, wei da khana u ya ka parom wa da lai luti wow seiñ ya ka.
Da khana u wa hapoh ka Barato Police Outpost em hadooh 26,000 ngut kiwa chong chnong wei da yoh leh ya i thaw wow chna ya i yung wa pura kani ka Outpost wa e da ka P. Dkhar na Barato hi.
Chooh chooh da ong u wa ha ki snem 2006-2010 da em ka BOP ha Mukroh na ki daw kajia pood wa i kaam ki damok kieñ suloi, katni won da kyntu u ya ki paidbah wow krehlang wa ki pulit khnang wow yakhun ya ki kaam wa man pyrchah aiñ.
Uwi na ki waheh na ka thaaiñ, u HT Well Sten, ynne ka sngi da ong u wa i por toh nadooh 2 Wisu (Mar) 1994, heiwa da khana u yei lai luti yong ki hapoh ka Latympang Welfare Organsation yow yoh ya ka Outpost ha Barato.
U MDC ka Barato, u Aiborlang Shadap hawa e yei ymklam da ong u wa i lai luti ki 28 snem da man iwa jop ynne wei da man ko ka sngi ka wow sahkynmoo.
Da ong u wa i booh ya kani ka yung krehkaam man ko kawa miat bha neibhah wa man ko ka chnong kawa hapyrdi yong ki chnong ka thaaiñ deiwa kyntu u ya i yakrehlang wa ka sorkar.
Neiliang u DC ka District, u BS Sohliya da ong u wa waroh sñiawsih ki ha ka 22 tarik u Khonchonglad wei kani ka Outpost daw wanrah ko yei chongsuk wa i yada ya ki paidbah.
Da ong u wa lada em iwon iwon i jia wa pyrchah aiñ daw ye u lai wut-wut cha itæ i thaw deiwa kyntu u ya i krehlang na ki paidbah.
U Nujorki hawa e yei klam da ong u wa ha ki snem wa dadep da sñiaw ya ki kaam pyrchah tangwa i em kani ka Police Out Post daw chngaaiñ ko ya ki paidbah.
Da e khublei u ya ki seiñ, kiwa mihkhmat warim wa ki waheh chnong wa da kreh ki wow yoh ya kani ka thaw.
Da kynmoo u leh wa hadooh le sien da rah u ya ini i kaam ha ka yung dorbar chna aiñ.
Da ong u wa heiyatoh wa i dawa kiwa boon ki seiñ wa emkaam u booh ya kani ka thaw ha Mukroh næ ha kiwi ki thaw, da ong u ya ki wa oo kam uwa mihkhmat rap tip u bar ya ki wei i em ko ha Barato em ko hapyrdi wei daw ye ko u chakri ya ki 20 tylli ki chnong wei da kular u leh wow booh ya ka BOP ha Muhkroh.
U Nujor da ong u wa i kaam wa dang sahteiñ toh u pynku ya ka Laskeiñ Block kam ka Civil Sub Dvision kamjooh leh wow kreh u wanrah ya ki chnong ka Block-I chapoh ka jylla.
Ha kani ka sngi da yoh leh i klam na u Stelin Lamare uwa man u Secretary ka chnong.
Ha kani ka sngi da thung leh ya u SI B Jala wow man u kam u Incharge wa nyngkong dooh kani ka Outpost.
