U MDC ka Musniang-Rngad u Phasmon Dkhar, ynne ka sngi da wai paidbah u yaka ATM wa nyngkong dooh ka thaaiñ Wapung kawa em ha Wapung Skur, ka yong ka Bank HDFC heiwa da emlang leh ki heh kani ka Bank nadooh ki Branch Manager ka ri-loom Jaiñtia, u khlieh yong ka North East u Roshan Thapa hadooh ki heh kiwa na Mumbai wa Kolkata.
U Phasmon da ong u wa da boodien u ya kani ka kaam kattu la ar snem neibhah ki bru kani ka thaaiñ hap ki wow lai chadooh cha Ladrymbai yow yoh ATM wei em kipor wa sepai i lai wa ym em poisa ka ATM wei em ki por wa sih ki.
Da ong u leh wa ym du kiwa na Wapung wa chem chitom wot hadooh kiwa na thaaiñ Tuber kiwa hap thooh ATM cha Ladrymbai hadooh cha Khliehriat yow yoh yaka ATM kawa hoi iwa man leh kam wow pynchitom ya ki paidbah.
“Sñiawkmen O wa kattu ini i lut por lut poisa daw wiar noh ki da i em kani ka ATM ka wow wai waroh 24 kynta chi sngi wa ha waroh 7 sngi ka tayaw.” Da ong Phasmon.
Neiliang ki arngut ki waheh chnong warim ka Wapung Skur, u N. Ryngkhlem wa u K. Dkhar da pynsñiaw ki yei sñiawngooh ya u Phasmon yei chimkhia yong oo wow pyrkhat yei emkaam ki paidbah wei wow pteiñ chooh chooh u ya ki kaam wa bha yong oo.
Neiliang ki heh ka Bank HDFC da pait ki leh ya i thaw yow wai chnat yaka Bank ha ki por wow wan.
Ha kani ka sngi da emlang leh u Secretary ka VDP u S Dkhar, u Tymmen Wasan u T. Siangshai, u H Sutnga uwa man u tre ka Syrpai Mahindra wa kiwi kiwi.
Discussion about this post