Ynne ka sngi, u Superintendent of Police ka West Jaiñtia Hills u Bikram D Marak, MPS da wan wai u yaka yung krehkaam yong ka Village Defense Party (VDP) ka chnong Kyndongtuber kam u kongsan.
Da emlang leh u Officer In-charge ka Phramer Traffic Cell u S.I. K.S. Lywait, wa kiwi tawan ki waheh kiwa yahkhmat yong ka chnong.
Hawa sdang da yoh yei klam pdiang burom na u President ka VDP Kyndongtuber u Moses Dkhar ha ka yalang wa tbian wa pynman chwa wow wai ya kani ka yung krehkaam kawa pynlai da u Waheh Chnong u Shiwa Siangshai.
Hawa e yei klam ha kani ka sngi, u SP da pynsñiaw u ya i kmen wow yoo yei yatylli ki dkhot kani ka VDP heiwa ki dkhot kynthai leh emlang ki. U kongsan da ong u wa ka chnong kawa ye u burom yaki kynthai toh ka chnong kawa ku chaphrang hei roi i paar. Da yaroh u leh yei krehkaam ka VDP kawa da pynduna yaki kaam sih kaam pyrchah aiñ hapoh kini ki ynñiaw snem.
U SP da e khublei u yaki dkhot ka VDP kiwa da ye u chna hi ya ka yung krehkaaam deiwa ya kynchew poisa wei yarap da ki kattu katni ngut kiwa chong chnong khlem em i yarap poisa na ka sorkar. Da khut da pynchlur u leh ya ki khynroo wa ki manbei kamjooh ki kynthai wow psiah dkhot ha kani ka kynhun yow ye u pynneh yei chongsuk chongsaaiñ wei wow yaleh pyrchah ya ki kam sih kaam pyrchah aiñ hapoh ka chnong.
Neiliang u Officer In-charge ka Phramer Traffic Cell hawa e yei klam da pyntip u chaphang ki rukom krehkaam yong ka VDP wei da kyntu u leh wow pteiñ yei yakreh lang ki waka Phramer Traffic Cell neibhah kani ka chnong haap ko hapoh i pait yong oo.
Kawi na ki dkhot ka VDP ka Percydora Lyngdoh da puræ ko yei lai luti ka VDP katwa neiliang u Secretary ka VDP u Longshlur Pakma da e khublei sñiawngooh u ya waroh chwa wow pynkut yaka yalang.
Hadien wa da dep ah yow Ribbon kam ka dak wa da wai yaka yung krehkaam, neiliang u SP wa u OC da kular ki wow pynyoh yaki miej ki almari wa emkaam hapoh kani ka yung krehkaam.
Heipor wa pynman yaka yalang, da bood leh yaki kyndon yada COVID-19 kamwa da phah da ka chnat i chait i nang yong ka sorkar.
Kani toh ka Wyrta na u Waheh Chnong Kyndongtuber.