Ka Dorbar Chnong Khimusniang, Jowai ha ka sien wa le da pynman biang ko da ka Common Platform namo ka rynsan yalap Election neibynta waroh ki kyrtong wei ka sien wa nyngkong toh ha u snem 2019 neibynta ka Election MDC, wa ar ha u snem 2023 neibynta ka Election MLA wei ha kani biang ka kynti yong ka Election MDC 2025.
Ha kani ka kynti da pynman ka hei janmiet yong ka 14 tarik uni u bnai neibynta ki kyrtong wa yakhun MDC cha ka JHADC na ka 19-Jowai South Constituency, heiwa neiliang u waheh chnong ka Khimusniang, u T.S. Bamon kam uwa pynlai ya kani ka yalang, da ong u i chim ka Dorbar Chnong Khimusniang ya kani ka rai toh wa yoo jngai ko yow suk ki paidbah wa chong chnong kamjooh ya ki kyrtong deiwa hap pynlut por chisien donhi u wan ha ka jooh ka thaw.
Na ki 5 ngut ki kyrtong, da wan wow chimbynta soo ngut wa kynthup ya u Iaibatlang Talang na ka VPP, u K. Dikylsingh Phawa na ka NPP, u Saron Paswet naka INC uwa man u MDC wa katni wa u Moonlight Pariat kam u kyrtong samen uwa man leh u MDC warim uwa da chah pynrem ha u Saron Paswet ha u 2019 katwa u kyrtong ka BJP, u Heimonmitre Phawa ym em wan u.
Kini ki kyrtong hawa klam da paan ki yei kyrchan na ki paidbah deiwa pynsñiaw haroh ki ya jar jiar ka yurim wa ka thong krehkaam wa ki angnood ki la jia poi ki hei jop.
U kyrtong ka VPP da klam u heiyatoh i kylla hei thij i pyrkhat kamwa ka Party yieñ u em ko ya kani ka thong, deiwa ong wa yoo u ka Election wa katni da phær ko na ki Election kiwa nachwa heiwa ki chnong ki thaw da chongsuk chongsaiñ ki.
Kyrpaad u wow e laad ya ka VPP yow poi ko hei bor ha JHADC wa kamjooh ha u 2028 khnang yow yoo yei kylla ha ka synchaar khadar kamwa da em i kyrmen hei thij i pyrkhat.
Kamwa da yoo yei kyrmen ha ka Election MP, yooluti u wa ini i kyrmen u pteiñ ko hadooh ka Election MDC wa MLA 2028.
U kyrtong NPP u Dikylsingh Phawa hawa kdaw yei eh i khoo hapoh ka Council, ong u lada pteiñ i dooh tulop ka Council daw chah ktah ym du ya kiwa kreh tangwa ya ki paidbah ka Ri-loom Jaiñtia hi waroh kawi neibhah ka toh wa pait ya ka riti dustur, i khyndaw u chyiap.
Kamtæ kamwa em u ka thong wa kwah u wow yada u pynneh pynskem ya ka District Council najrong wow wanrah ki Policy thymme neibynta i myntoi ka jaitbru, kular haroh u wa lada poi u hei jop daw thooh laad u wow prat luti yow ye u wanrah da ka Direct Funding na ka sorkar bei khnang wa neibynta ka tulop u yoh bait hei dur yong ka Grant kamwa yoh lang kiwi kiwa kreh sorkar.
Neitæ u yakhun wanrah leh ka Policy hajrong kammon u yoh pynkrehkaam ya ki Scheme ki Project kam kiwi won ki Autonomous Council kam ka North Cachar, Karbi Anglong, Dima Hasao kiwa yoh yaka hok u wanrah ya ki Scheme pynroi lyngba ka Council.
Hawa kyrpaad ya ki paidbah wow jied ki ya ka Party kawa em ha ka sorkar wei kawa kreh yei kaam, ong u wa oo wow man kam ka yingkieñ cha ka/u MLA wa cha ka sorkar NPP neibynta ki paidbah.
U Saron Paswet kam u MDC ka Jowai South wa jop ha u 2019, hawa paan biang i kyrchaan na kiwa chong chnong ka Khimusniang, ong u wa ha ki 6 snem wa da lai kam u MDC da yaleh u wow wanrah ki Scheme pynroi hapoh ki chnong ki thaw ka Constituency, kamtæ neidaw wa dang em i sahnood u wow lehbha chooh chooh kamjooh leh wow pynmiat pynbha yei rukom krehkaam hapoh ka Council nadooh i rukom pynlai pynwan ya ki yukheiñ yudiah.
Kam u MDC khana u wa haka samoi krehkaam yong oo najrong wa yaleh ki u pynduna i thung kreh hapoh ka Council yow lait ware i lutphut, pynsñiaw haroh u ya ki kaam wa da leh ka Council heipor wa dang man u kam uwi na ki EM.
U Moonlight Pariat hawa klam ong u i daw wa mih yakhun MDC biang u ha kani ka kynti toh wa yoo u ka Council da haap da oor ko, wei ym em de wa pait wa yoo ha kini ki 6 snem.
Da pynkynmoo u wa ha u 2018 wa yoh ksoh CEM u du 80 sngi donhi, da em i khut yaklam ki heh na Delhi lyngba ka hukum yong ka Home Ministry neibynta ki 3 tylli ki District Council ka jylla Meghalaya yow yaklam ya pynbait wei pynjem ya ka 6th Schedule kawa man i chram wa kah khnang yow kyrriah charood.
Da wanrah ya ka Proposal neibynta ka Amendment yong ka 6th Schedule namo u pynjem yaka riti synchaar ka ri India neibynta ka 6th Schedule, heiwa dadep phah cha Delhi wei da kular u Home Minister ka India u mynjur ya kani ka aiñ hapoh Parliament ha u bnai November 2024 tangwa wym em leh ki ka.
Neidaw kani ka chram wa chah yaka District Council wym yoh ko u lai sak (Direct) cha Delhi neibynta u paan ki Scheme waphær waphær lada wym lai bynta chwa na ka sorkar jylla ka Meghalaya.
Da tasngah haroh u yaki para kyrtong wa chimbynta haka rynsan Common Platform deiwa ong ya ki, “Ham jooh kular wa daw ye phi u leh itæ itæ, ha wym tip che ya ka aiñ, ham jooh pynbiej yei wym ye u man, tangwa klam yei sakhiat”.
Kamtæ kyntu u ya ki paidbah ka Jowai South wow jied ki ha kani ka kynti da u bru wa ye u pynim ya ka District Council wa ye u lai yaklam cha Delhi, neibhah kani ka Bill da em ko ha kti ka sorkar India, wei lym em ki bru wa chemphang u lai li tynrooh, daw booh ko hei maa yaboi chah pyndooh pathan wa ka District Council.
Discussion about this post