Ka Jaiñtia Fishing & Environment Protection Association (JFEPA) ynne da pynman ko ya ka yakob khwe dakha kawa da sdang nadooh 6:00 waje i step wei da wan wow chimbynta da kiwa boon kiwa ka-it u khwe heiwa ya ka yakob khwe da pynman hei bynta ka wah Myntdu nadooh Damser (Treiongriang) hadooh Yongstang Wah.
Haka yalang saam khusnaam wa pynman ha Yungwalieh ka Tpep Pale, Jowai wa pynlai da u D.H. Pde, President ka Jaiñtia Fishing & Environment Protection Association, neiliang u General Secretary warim ka seiñ u N.K. Lamare da khana u yei lai luti ka seiñ wei kani ka yakob khwe da man ka sien wa 29.
Neitæ hawa pynsñiaw u ya ki kyndon pynrkhiñ wa ka seiñ da pynkrehkaam ko hei bynta ka wah Myntdu kam chibynta u e yada ya ki dohum, pyntip u leh wa da em ki bru wa jooh yoh kem hajrong i leh pyrchah yong ki.
Kamtæ khut u i yakrehlang ki paidbah chirup waka seiñ yow ye u yada ya ki dakha ki dohum hapoh ka wah Myntdu wa kynthup leh ka Fish Sanctuary wa em ha Syntu Kaisar.
Neiliang u kongsan kani ka sngi u R. Rymbui, Superintendent of Fisheries, West Jaiñtia Hills da yaroh u yei lai luti kani ka seiñ heiyatoh u pynneh pynsah ya ki um ki wah, wei neiliang ka chnat krehkaam yong oo leh katwa ye i bor jooh e ko ki laad yarap cha kiwa em i angnood u psan dakha wei wow yada ya ki dohum deiwa khana leh wa hapoh West Jaiñtia Hills da em hadooh kamwa 12 tylli ki Fish Sanctuary.
Ha kani ka sngi sñiawkmen u leh wow pyntip wa na waroh ki Fish Sanctuary wa em hapoh ka jylla, ki artylli wa da chah jied wow leh Documentation namo wow thoh bniah neibynta u phah cha Delhi toh pyn-ar kiwa na West Jaiñtia bait kitæ kynthup i ya ka Syntu Ksiar Fish Sanctuary wa em ha Jowai waka Amkahoh Fish Sanctuary wa em ha Sohkha.
Ong u wa ini i jied wow leh Documentary toh yow booh naam haka Website yong ka chnat Fishery ha Delhi.
Hajrong i yoo u wa rap boon ki dakha Dkhar bar yaki dakha Pnar wa yoh kiwa khwe ha kani ka sngi, pyntip u wa kamwa ka chnat yong ki hi kwah ki wa ki wah hapoh ka District toh u em da ki dakha Pnar, yooluti u wa daw yoh biang u pynlait symbe dakha Pnar haka wah Myntdu neibhah da em ka laad wa ye u yoh yarap lyngba ka chnat Fishery yong u snem 2021-2022 wei da dep tyrwa ki leh wa ka wah Myntdu u yoh ko ya kitæ ki symbe.
Ki khusnaam wada saam ha kani ka yakob khwe kynthup 3 tylli neibynta ki dakha Pnar, 3 tylli neibynta ki dakha Dkhar wa 10 tylli ki Consolation Prize deilang ka song poisa.
Uwa yoh nyngkong haka dakha Dkhar toh u N.Pde uwa da jop leh ya ka song poisa T. 10,000, wa ar u C. Laloo uwa da yoh T. 5,000 wa le u K. Lytan uwa da yoh T. 3000.
Haka dakha Pnar won da yoh nyngkong u D. Passah uwa da rah lang waka song poisa wa T. 10,000, wa ar u D. Syngkon uwa da yoh T. 5,000 wa le won u Y. Lamin uwa da yoh T. 3,000.
