theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Wow da u kær ya ki hajar, pyndep ka Raij Mynso ya ka Behdieñkhlam Behkymphui

Ki khon ka Raij Mynso ynne ka sngi da pyndep ki ya ka lehniam Behdieñkhlam Behkymphui kawa man ka lehniam wa chisien chisnem heiwa da sdang ya kani ka lehniam ha uni u snem nadooh ka 22 tarik uni u bnai heiwa da pyndep ya ki lehniam wa boonjait katkam ki sarin yong ka Behdieñkhlam Behkymphui. 

Ynne ka sngi pynkut chwa wow sdang ka bynta wow pyndep ya ka lehniam da em ka yalang wa tbian ha yung Seiñraij Mynso ha Pdeiñ Tyllu heiwa u MDC ka Nonjngi u E. Teron da man u kam u kongsan. 

Advertisement ad1

Kani ka lehniam ki khon ka Niamtre ka Raij Mynsoo toh chwa wow wanrah ya u kba u khoo na hali cha yung wei wow yada ya oo wa kiwi ki mar rep na i sih i baam khñiang wei khamtam leh wow yada ya ka chnong ka thaw, wow yada ya ki hajar ki khon ka Raij ka Elaka na i kjut i chitom saja wa kiwi kiwi iwa man i sih iwa ye u ktah ya ka imlang sahlang.

Heijooh i por ya kani ka lehniam da pyndep ya ka hajrong wow paan i yada, deiwa e ngooh e dem ya ki Blai ki Syiem, ki Blai Ryngkaw wow e ki kamjooh leh i kyrkhu kyrdoh ya ka imlang sahlang waroh kawi.

Ynne ka sngi hadien wa da kut ka yalang na Yung ka Seiñraij da hiar won cha Yung Langdoh wow pyndep ya ka e ngooh e dem wa i suit i choor yeiwa da pyndep da ki waheh ka Raij kam u Langdoh, u Dolloi wa kiwi kiwi.

Hadien wa pyndep yei suit i choor da mih na Yung Langdoh wei da lai da rah ya ki kymphui kiwa man ki dieñ wa da tah hei saphup wei da sæh ya ki kattu katni tylli ha tymbud luti nadooh na Khloo Blai cha Yaaw wow tyngkheiñ ya ki chken wa da pynthiah harood sarok kam ka dak wow tyngkheiñ ya ka khlam yeiwa da pynbood won sa i e ngooh ya ka Um Ñiawwyrnai kawa em ha Yaaw chwa wow hiar cha kani ka Um. 

Na yaaw da mih wow lai cha i thaw wa tip kam ka Tre Madan Mari heiwa da pyndep ya ka Kñia Syiem Khlam Syiem Dait heiwa da e kñia da kawi ka sniang.

Ka lehniam ynne ka sngi da man ko kawa lai bait wei kawa phooh wa phieñ heiwa da pyndep ya ka katkam ki hukum ki adong yong ka Niam wa da sikai da pynjooh nadooh warim.

Advertisement ad1
Share this:
Previous

Pynskem ka AITC ya ka Mawkyrwat Block

Next

Wan chimbynta chongchit kiwa boon ha ka yakob khwe ka JFEPA ha wah Myntdu