U Montri ka chnat Animal Husbandry & Veterinary, u A.L. Hek ynne da wai u ya ka Star Elite Pathway Training Camp wa le sngi ha SAI, NEHU, Shillong. Kani ka e sikai toh kawa pynman da ka Meghalaya State Olympic Associations (MSOA), Arms PT- Edge10- Sportality Team chirup wa ka Department of Sports and Youth Affairs.
Ha kani ka sngi da emlang u Chief Secretary, u D.P. Wahlang, u Ian Campbell, Olympian (Australia), 1980 Olympics, u Jesper Olsen, Director, Future Football (uwa jooh yalehbol World Cup na Denmark wa ya ka Manchester United), u John Khasrshiing, President ka MSOA wa kiwi kiwi.
U Hek da yaroh u ya ka MSOA wa pynman ko ya kam kani ka e sikai ka wow yarap ya ki khynroo ka jylla. Wei da kmen u wow yoo wa wan chimbynta chongchit ki khon ka jylla ha kani ka e sikai wei da yooluti u leh wa daw ye ki wow poi ki cha iwa da booh thong kini ki Coach.
Kam wow kdaw heini wa hadien wa ka bynta wa nyngkong namo Phase-I kani da man ko kawa jop, neiliang ka MSOA chirup waka Department of Sports & Youth Affairs da pteiñ ki ya ka bynta wa ar namo ka Phase-II da ka thong wow pait ya ki phaw hajar ngut kiwa yalehke wow chem ya kiwa em sap yow man kam ki khloor yalehke na ki C&RD Block, wei kamwa man hadooh ka 31 tarik u Wisu uni u snem ka MSOA, Arms PT- Edge10- Sportality Team da pyndep ko ya ka Talent ID Test ha ki 18 tylli ki C&RD Block.
Ki 200 ngut kiwa poi chaphrang kiwa 100 ngut ki chynrang wa 100 ngut ki kynthai kiwa da tipmit na ka Phase-I da chah jied ki wow yoh ya ka e sikai wa chi snem hapoh kani ka Elite Pathway Program.
