Ka yung krehkaam ka chnat District Horticulture, West Jaiñtia Hills hapoh ka Mission for Integrated Development of Horticulture (MIDH) 2024-2025 ha ka 16 tarik uni u bnai da pynman ko da ka yaaw pynyoo rong ya ki mar rep wa tip kam ka Horti Fair-Cum-Exhibition ha madan ka Marian Hill Higher Secondary School, Jowai heiwa ki warep da wan emlang ki ha kani ka sngi deiwa rahlang ki ya ki mar rep, kamjooh leh kiwa seiñ khih wa pynmih ya ki tiar waphær waphær napoh ka District da wan pynyoo rong wan dai ki yaki tiar yong ki.
Ka D.V. Lyngdoh, Additional Deputy Commissioner, West Jaiñtia Hills da wan sakhi ko kam ka kongsan ha kani ka sngi, katwa ka Luciana Lakiang, MAS Joint Director of Horticulture (PA&A), Shillong kam ka symbood kongsan.
Hawa klam, ka D.V. Lyngdoh da yaroh ko yei chim ka chnat Horticulture u pynman ya kani ka Horti-Fair-Cum-Exhibition neibhah wa pynmyntoi i ya ki warep yong waroh 4 tylli ki Block ka West Jaiñtia Hills District deiwa wanrah ya ki ha kawi don ka rynsan u pynyoo rong wei dai ki ya ki tiar wa pynmih wa chna kamjooh ki mar wa rep.
Da ong ko leh kani ka Exhibition man ko ka laad wow yoh yei tip i chemphang kylliang hapyrdi ki warep lyngba i yachem yumut i e buit kylliang. Heijooh i por ki warep toh u paan buit ki na ki sahep yong ki chnat waphær waphær hajrong ki Scheme wa ki laad e kyrchaan waphær na ka sorkar.
Hawa yoh yei kyntien yahkhmat na u R. Lamare, Assistant Director of Horticulture, West Jaintia Hills da batai haroh u hajrong ka MIDH kawa man ka Scheme e yarap yow pynku yei rep wa yatoh wa ka chnat Horticulture.
Ka Luciana Lakiang da pynsñiaw ko cha ki warep ya ki Scheme wa ye u yoh hapoh ka chnat Horticulture wa Agriculture.
Da pynsñiaw haroh ko hajrong i emkaam wow pynmyllien rep da ki sboh ramaw neibhah wa yarap bha i yei chait i khiah najrong wa i rukom rep leh man iwa miat.
Ka M. War, Assistant Director Agriculture Officer, (Agronomy) da batai ko ya ki warep hajrong kammon u yoh ki laad yarap na ka sorkar, e yumut haroh ko ya ki warep wa lada chah pynsih ki mar rep lyngba i bor ka ramaw toh u phah pyntip smat cha ka chnat wa toh u pait hapoh 48 kynta khnang yow pyntikna ya ki laad yoh yarap.
Pyntip ko leh wa ki laad yarap wa ye u yoh lyngba ki laad wa boonjait kam ka Loan wa duna Interest, ka KCC, neitæ ka Insurance Schemes neibynta ki mar rep, najrong kiwi won ki laad wa ye u yoh kam ki tiar pynemkaam hawa rep, neitæ ki kor ki bor wa kiwi.
Kamtæ da kyntu ko ya ki warep wow lai mih cha ka chnat yong i rep i riang khnang wa iwon iwon wa emkaam yow yoh ki yeo yarap.
Kiwi won wa e i klam kynthup ka S.E. Kynjing, District Horticulture Officer, West Jaiñtia Hills, u Demandson Lyngdoh, Assistant Director of Horticulture (Marketing), West Jaintia Hills, ka Lakidon Khonglah, HDO Amlarem, ka Aibapynsuk Khongwar, ADO (HQ), DAO Jowai wa ka A.M. Pasweth, Horticulture Development Officer (PP), West Jaiñtia Hills, Jowai.
Discussion about this post