Wan ekti ka TMC ya ka lama cha ki 12 ngut ki MLA wow pynhær ha Meghalaya

Hadien wa 12 ngut ki MLA yong ka Congress hapoh i yahkhmat u Dr. Mukul Sangma da pynbna paidbah ki wow lai yabi noh cha ka All India Trinamool Congress, kiwa yahkhmat ka TMC da wanpoi ki ynne i janmiet ka 25 tarik, ha nongbah Shillong heiwa da ekti ya ka lama yong ka TMC ha ki dkhot wa thymme ha ka jylla Meghalaya.

Ki ar ngut kiwa yahkhmat ka TMC kiwa da wanpoi ha Shillong wow e khublei wei pdiang sñiawbha ya ka kynhun ki MLA, toh u Moloy Ghatak wa u Manas Bhunia kiwa toh ki Montri hapoh ka sorkar yong ka Mamata Banerjee ha West Bengal.

U Monoy Ghatak da ong u wa toh ka sngi wa khroo ha ka jylla Meghalaya neibhah ka luti wa jied ki 12 ngut ki MLA hapoh i yahkhmat u Dr. Mukul Sangma wa u Charles Pyngrope wow pynyabi cha ka TMC da pynman ya ka Party wow man ka Liang Pyrchah ha ka jylla Meghalaya.

Neiliang u Manas Bhunia da pynsñiaw u yei kmen wa kiwa yahkhmat wa naam yong ka jylla, kam u Dr. Mukul uwa man u Montri Rangbah warim wa u Charles Pyngrope uwa man u Speaker warim ka jylla deilang wa 10 ngut ki MLA da jied ki wow em wa ka TMC, wei i em yong kini kiwa yahkhmat ka jylla da pynman wow khriñ ya ki paidbah ka jylla Meghalaya. Da ong wa hapoh i yahkhmat yong ka Mamata Banerjee ka jylla Meghalaya leh ye ko wow yakhun ya ki bor kiwa pyrchang wow pynjæd ya ka ri India, kiwa da pynsih leh ya ka synchaar paidbah.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Neiliang u Dr. Mukul Sangma da ong wa i rai yong ki 12 ngut toh neibynta wow e yei chakri wa rap bha ya ka jylla, wei man ko kawa emkaam kam kiwa yahkhmat wow jied ya ka Party kawa ye wow krehkaam bha neibynta ki paidbah kiwa da pynkup ha kiwa mihkhmat yei kitkhlieh.

Da ong wa heipor wa em ki ha ka Congress da pyrchang wow pynbait ya waroh i eh wa wan hakhmat, tangwa ym poi cheiwon cheiwon leh, wei da pynrap u wa hadien ka Election 2018 ka Congress da yoh ko boon ngut tam ki MLA tangwa ym ye ko wow wan hei bor na kiwa boon ki daw, hanla em ko yei pyrchang hok wow yakhun ya ki bor kiwa thmu wow pynpiah ya ka ri.

U Dr. Mukul da ong u wa lada hap wow yakhun pyrchah ya ka BJP wa ya ka kynhun synrop, emkaam wow kut yumut wow pyndooh yei myllien wow suki hi-eh wei wow e laad won ya ka BJP wow leh katwa ngiat wei emkaam wow pynsangeh syndon ya ka BJP wow ngooid yei bor synchaar ha man ki jylla.

Da ong u wa i jied wow em ha ka TMC toh neidaw wa kamwa man katni, du ka TMC kawa em sakhiat ya ka thong wow yakhun pyrchah ya ka BJP.