Ki khynroo khyllood wa thooh khih thooh kreh ka West Jaiñtia Hills District ha ka 18 tarik da lai mih ki cha ka Recruitment Drive næ ka laad pynyoh kreh wa da pynman da ka Meghalaya State Skill Development Society (MSSDS) ka sorkar Meghalaya ha District Library Auditorium, Mynthong, Jowai.
Neiliang u Lambor Suchen, Skill Development Officer, MSSDS, West Jaiñtia Hills District ong u ini toh i sdang wa khian ka MSSDS hei wow pynyoh i sikai pynpliah yei sap ki khon khynroo khyllood kiwa da pyndep yei puræ puthi kamjooh leh ya kitu kiwa da dam skur yow yoh khih yoh kreh ki wei yow ye u kyrchaan pyn da ki ya ki hi.
U Lambor pyntip haroh u wa i pynman ya kani ka Job Recruitment Drive toh yow pynyoh khih ya ki khynroo khyllood ha ki bynta waphær waphær hapoh India kamjooh cha baar ri, wei ka MMSSDS Office dadep yaklam pyntoh lok ko wa ka ri Germany, Japan wa ka Singapore yow e khih ki ya ki khynroo khyllood ka thaaiñ.
Ong u kiwa chah jied wow kreh cha bar ri ye ki u yoh ka tulop nadooh Rs. 90,000 hadooh Rs. 3,00,000 chi bnai, katwa kiwa kreh won hapoh India ye ki u yoh ka tulop Rs. 18,000 hadooh Rs. 60,000 chi bnai wei ini chong hei jait kreh wa i rukom khih ki.
Kani ka laad wa da wanrah man ko leh chibynta i chimkhia ka sorkar hapoh i yahkhmat u Chief Minister yow pynkupbor ya ki khon khynroo khyllood wei pynyoh khih pynyoh kreh leh ya ki.
Ha kani ka sngi ya ki khynroo khyllood wa wan thap pyrtuid da yoh ki leh i batai pynche khnang yow che u rap sñiawthooh bha ki yei sap yong ki wa kamjooh ka thong yong ki chakhmat.
Kiwa chah jied hadien ini i pynsñiawthooh da khut won ki wow yaleh Interview ki.
Kani ka jooh ka Recruitment Drive da pynman leh ha Amlarem Sub-Division, Amlarem ynne ka 19 tarik.
Discussion about this post