Ynne ka sngi da khut yalang ki seiñ niam ka Greater Shillong City ha Conference Room ka yung krehkaam ka Deputy Commissioner, East Khasi Hills District, Shillong heiwa da wan chimbynta da ki 15 ngut na ki seiñ niam chirup wa u Superintendent of Police, ki ADC wa Sector Magistrate.
Ya ka yalang wa pynman toh wow paan i kyrchaan na kiwi ki niam wei wow im suk im chngaaiñ ha ka lehniam Durga Puja heiwa ki seiñ niam da ekhublei Puja ki ya waroh deiwa kyntu wow wanrah yei chongsuk.
Ha kani ka yalang da chimbynta leh da ka Central Puja Committee, ka Shillong All Faiths Forum wa ki niam Muslim, Sikh, Christan wa ka Seng Khasi Kmie.
Neiliang u President ka Central Puja Committee, u Naba Bhattacharya da ong u wa ki paidbah ka Meghalaya khlem kheiñ ya ka niam wa jaitbru emkaam wow wanrah ki yei maya wei chongsuk hapyrdi iwi.
Neiliang u Rev. John Madur, Arch Diocese ka Shillong, da ong u wa waroh kiwa chong chnong ka Shillong kwah ki yei chongsuk, i yatylli wa i burom mar kylliang.
U Noor Nongrum, wa man kam u Asst. General Secretary, Shillong Muslim Union da kyrchaan u ya ki Durga Puja Committee ka Shillong wow yoh ki ya ka Durga Puja wa suk wa saiñ.
Ha kani ka yalang, ka Isawanda Laloo, kawa man kam ka Deputy Commissioner ka East Khasi Hills District da e khublei ko ya waroh kiwa yahkhmat ka CPC, kiwa da kreh neibynta i bha i miat liang wanang.
Da rai leh wa waroh u kreh ki neibynta i chongsuk liang wanang hapoh ka District.
Kiwi kiwa da klam ha kani ka yalang toh u Rev. GS Lytan, Presbyterian Church of India, Rev. R. Imiong, Church of God, u Hammarsing Kharhmar, Seng Khasi Kmie, Gurcharan Singh, President SGSS Gurudwara, Raj Bhavan, JL Das, General Secretary, CPC wa u Rev. E. Kharkongor, Secretary, Shillong All Faiths Forum.
