Wan pait u Lat ya Ka Mujra Ka Mukan ka Kur Passah, Jowai

Ynne ka sngi man ko ka wow sahkynmoo yanom ya ki khon ka Kur Passah, heiwa u Lat ka jylla, u CH Jayashankar da wan hiar u ha Ka Mujra Ka Mukan ka Kur wa em ha Thaw Thang Sati, Chutwakhu, Jowai.

Ha kani ka sngi da em ka yalang wa tbian wa pynlai da ka Rudamaya Passah heiwa da yoh i kyntien pdiang burom na ka Finland Passah, i ngooh Blai na u Kñi ka Kur, u Dawiang Passah.

U dkhot ka Kur, u S. Passah da khana u ya ka parom wa tbian ka Kur heiwa da khana u wa ka Kur toh kawa hiar na ka Seiñjait ka Bor Bupli kawa man ka khon wa nyngkong ka Blai Kupli.

Da khana u wa Ka Mujra Ka Mukan nachwa toh ka thaw wa pynchong pynthiah ya ki chyieñ kiwa da khlaad hadien wa dep ya ka Niam Thang wa kamjooh ka Niam Le Yadaw tangwa ha ki snem 1800 ki pharæng da pynthut wei da pynsangeh ki ya kani ka lehniam kamwa da pynsangeh ki ya ka lehniam Behdieñkhlam.

Heijooh i por da ong u wa ini i leh ki pharæng da pynman i ya u Woh Kiang Nangbah wow yahkhmat wow yaleh pyrchah ya ki pharæng.

Da khana u leh wa ki khon ka Kur kiwa katni da pyrchang ki wow pynneh pyndap ya kini ki thaw wa kyntang wei da kyrpaad u ya ki jan yung jan sem wow burom ya ini i thaw.

Neiliang u Lat hawa e yei klam da yaroh u ya ka sor Jowai wa man ko kawa khooid wei sñiawkmen u wa hanla wan u na ka jylla Karnataka na ka sor Mysore da ong u wa kani ka thaw cha Meghalaya man ko kawa da tam baar ya ka sor wa wan u.

Da kyntu u ya waroh wow pynneh yei khooid kamjooh yei man kyntang ini i thaw neibynta ka mynried mankawi deiwa pynrap wa sñiawkmen u wow tip wei wow yoo ya ini i thaw kammon kordor i ya ka Kur Passah.

Chooh chooh da ong u wa da tip u yei rukom im ka jaitbru wa ka Kur wei kamtæ kat ha iwon iwon i por wa emkaam ye ki wow kyruiñ cha oo.

Heijooh i por da sñiawngooh u ya ka Kur Passah kawa da khut ya oo ynne ka sngi deiwa ong leh wa kiwa ymtip ya ka parom tynre yong ki ymye ki wow chna ya ka parom thymme.

Ha kani ka sngi u Lat da wai u leh ya u Moo Sahnaam wa da wan u ynne wow sakhi ya i kær pynmiat ya Ka Mujra Ka Mukan.

Da pynkut ya ka yalang da ki kyntien khublei na ka Lekimai Passah.