Ki MP ka jylla Madhya Pradesh wa kynthup ya u Sumer Singh Solanki uwa man u MP ka Rajya Sabha wa u MP na Indore cha Rajya Sabha, u Shankar Lalwani, da wan poi ki ha Shillong yow booddien yei thooh ya ki ar ngut ki chi kurim kiwa uiñke suwari na Indore, Madhya Pradesh kiwa da wiar ha thaaiñ Sohra nadooh ka 24 tarik uni u bnai.
Kini kiwa mihkhmat ka Madhya Pradesh deilang kiwa ha-yung yong ki chi kurim da yachem ki wa u Chief Secretary ka jylla, u DP Wahlang, u DIG Eastern Range, u Davis NR Marak wa u SP ka East Khasi Hills, u Vivek Syiem yow booddien yei thooh ya u Raja Suryavansi wa ka Sonam Suryawanshi.
Neiliang u Shankar Lalwani da ong u wa hun ki yei pyrchang yong ka sorkar jylla yei thooh ya ki ar ngut kiwa da wiar wei dang booddien wow e buit yow pyntikna wow chem smat ya ki.
Heiyatoh wa ini, neiliang u Montri Rangbah ka jylla, u Conrad Sangma da ong u wa dadep yaklam u wa u Montri Rangbah ka Madhya Pradesh wei da yoh Phone u leh na ka Home Ministry ka sorkar India, wei neiliang yong oo da booddien u yeini man-ka-sngi.
Da ong u wa ki pulit da kreh ki khlem da sangeh yow thooh ya kini kiwa wiar wei da chimbynta leh da kiwa chong chnong heini i jooh i kaam.
U Conrad da ong u wa kani ka thaaiñ Sohra toh kawa da sdang yoh slap ha kini ki por wei ymtoh iwa suk leh ya kiwa thooh ya kini ki bru.
Da ong leh wa katkam wa da tip, hadien wa kini ki chi kurim ieh ki ya ka Scooty wa chim wai ki, ye u man da lai ki dei kjat wei kani ka thaw toh kawa em ki thaw lai leh Trekking ha waroh ar liang kiwa synrang bha, wei ha kini ki por suk bha leh wow tlær. Kamtæ da ong u wa i thaw wow thooh ki toh iwa heh bha.
“Kiwa wan uiñke suwari da kheiñ i ya ki kam kiwa chi-yung chi-sem khamtam ha Sohra, kamtæ waroh kiwa chong chnong da ya mih ki wow ya krehlang,” da ong u Conrad.
Discussion about this post