15 49.0138 8.38624 1 0 4000 1 https://wyrta.com 300 0

Wan pynbaam smai u DC ya ki dkhot thymme wa pura ka MPUF-CB

0 Comments
Advertisement ad1

Jowai: U Deputy Commissioner yong ka West Jaiñtia Hills District, u Garod LSN Dykes, da chim u yaka bynta wow pynbaam smai yaki dkhot thymme yong ka seiñ Meghalaya People United Front (MPUF) seiñbei, ha ka yalang kawa pynman ha District Library Mynthong Jowai, ynne ka sngi.

U DC hawa e yei klam da ong u wa sñiawkmen u wow yoh ya kani ka ka laad wow pyndep ya ka pynbaam smai ya ki dkhot yong ka seiñ MPUF-CB, da ong u wa ka ri India toh kawa tip kam ka Democratic Country, kawa man ka rukom synchaar yong ka wa em ka liang synchaar wa ka liang pyrchah hapoh ka sorkar yong ka, kamjooh leh ki seiñbhalang waphær waphær ye ki wow seiñ ya kawon kawon ka seiñ yong ki, neibynta wow pait ya i lai bait lai ryntih haka rukom synchaar khadar wei wow kreh haka imlang sahlang neibynta ka roi ka paar kamjooh wow yarap ya ki kaam ki jaam ha ka imlang sahlang yong ka jaitbru wa ka ri.

Advertisement ad1

Neiliang u Garod da kitbok kit rwiang u ya kiwa kitkaam wa thymme kamjooh leh ki warim kiwa dang pteiñ wow chakri ya ka kaam, wow kreh wow chakri hok ya ka kaam neibynta ka bha ka miat yong ka jaitbru wa ka ri hi waroh kawi.

U Dawanpoimi Laloo u President warim ka seiñ, da chah jied biang u kam u President wa thymme, hadien wa da ieh noh u yaka kaam President na i daw wa yakhun Election MDC ha kani ka Election MDC wa dang dep wei ym em poi u cha ka thong tangwa katni ki dkhot yong ka seiñ MPUF ki dang yoo biang ki ya oo wow man u kam uwa yahkhmat ka seiñ. Ya ka yalang ynnne ka sngi da pynlai da u H. Bhoi, Publicity Secretary.

Kiwei de kiwa kitkaam ka seiñ toh u General Secretary u Aimonbha Syad, Assistant General Secretary u Rilangmi-O Paslein, Organising Secretary u Michel Chyrmang, Assistant Organising Secretary u Kyrshan Blah deilang wa 6 ngut EC Member kamjooh ki dkhot kiwa kynthup ya ki khynroo wa khyllood.

Ha kani ka yalang ynne ka sngi da emlang leh u President ka JSU u Lawyer Son War, President HNPF Lone Laloo, ki dkhot yong ka seiñ na ki Unit wa Circle yong ka East wa West Jaiñtia.

Da pynphooh ya kani ka sngi da ki chaad wei rwai tynre na ka Seng Khynroo Khyllod ka MPUF deilang wa kiwi de ki leh sñiawbha.

Advertisement ad1

0 Comments

Leave a Reply