U dkhot ka Hynniewtrep National Liberation Council (HNLC) uwa tip pyrtuid kam u Junel Tongper uwa khut siñ kam u June da wan pyndem u hakhmat u heh ka BSF u Inderjit Singh Rana, IG BSF, Meghalaya Frontier deiwa emlang de kiwi ki heh ka BSF wa kiwi de.
Ya i wan pyndem u June da leh ha BOP Umkiang, East Jaiñtia Hills ynne ka sngi wei toh uwa naka chnong Lumphyllut wa dang em hapoh ka Umkiang PS.
U June da psiah u cha ka HNLC ha u snem 2010 wei da man u leh kam u Area Commander ka East Jaiñtia Hills wei uni toh uwa da dep chah kem nyngkong ha u snem 2015 ha ki pulit ka Meghalaya tangwa hadien wa yoh jamin u da yut noh u.
U June da psiah biang u cha ka HNLC ha u snem 2020 wei da em u cha Bangladesh ha Moulibazar District ka Bangladesh ha ka chnong Panaipunjee.
Neiliang u Rana da ong u wa ka HNLC da chim kabu ko yei wym yoh khih yoh kreh ki khynroo wow phon ya ki wow psiah cha ka wei neiliang ka BSF da kynjoh ktien ko ya u June nadooh ynnin u snem wei neiliang yong ki u yaleh ki katwa ye wow yarap ya kiwa da chah yahbakla wow wan biang ki chapoh ka imlang sahlang.
Ha kani ka sngi da emlang leh kiwa hayung hasem u June kiwa da pynsñiaw yei kmen wa da liwan yung biang u khon ki.
