Heiyatoh wa i jia tyrrah kari hapyrdi kawi ka Scooty wa kawi ka Truck Dumper iwa da jia ynne ha u sarok NH-06 hajan ka Jowai Civil Hospital, Ialong, neiliang ki pulit da pyntip ki wa uwa yah ya ka Truck da wan pyndem u.
Katkam wa pyntip ki pulit, ynne i step heipor kamwa 10:00 hadooh 10:30 da antaad wa jia ini i ya tyrrah kari wei da pyntip cha ki pulit da ki bru wa lai luti na kani ka thaw wa jia.
Kamtæ da lai u SI CRW Nongbri deilang wa kiwi ki pulit cha kani ka thaw yow pynman yei takit heiwa da chem ya ar tylli ki metyap kiwa thiah ha sarok.
Kini ki ar ngut toh kiwa da takha joor heiwa uwi da mynsoo joor u nei bynta i khlieh wei da takha leh i bynta u kpoh katwa uwi won da joor bha mynsoo u neibynta i khlieh.
Ka Truck wa embynta ha ini i tyrrah kari toh kawa em Number ML-04C-4968 wei uwa yah da yut u na ini i thaw wa jia.
Hadien wa pyndep yei takit, da kit ya ki metyap cha Civil Hospital, Ialong heiwa da booh ki hapoh ka Morgue wei ya ka Post-Mortem daw pyndep mynstep i step.
Hei takit ki pulit da chem wa kini ki ar ngut kiwa em ha ka Scooty toh kiwa dang mut wow lai cha Mihmyntdu yow lai kreh da ka kani ka Scooty wa em Number ML-04D-7246. Da chem wa kani ka Truck leh toh kawa lai chei jooh i liang na Ialong cheiliang Jowai heipor wa jia i ya tyrrah.
Mar ya jia i tyrrah kari, uwa yah ka Truck da yut u tangwa hadien won da wan u wow pyndem ha ki pulit ka Phramer Traffic Cell, WJHD.
Neiliang ki pulit da kyntu ki ya kiwa ha-yung ha-sem kiwa yap wow booh smat ki ya ka FIR.
Kiwa khlaad toh uwa tip kam u Eiseiñlang Tang (25 snem) u khon ka Siwil Tang uwa chong chnong ka Thadmuthlong C, WJHD uwa man leh uwa yah ya ka Scooty wei uwa chong hadien toh u Nehlang Suchiang (19 snem), u khon ka Diangbha Suchiang na Thadmuthlong B, WJHD.
Discussion about this post