Ha ka yalang wa da pynman ha ka 5 tarik uni u bnai ha chnong Lumshken wa haap ha ka 29-Bataw Lakadong Constituency, ki paidbah da ki hajar da wan ki wow pynyoo yei kyrchaan yong ki ya u Dr. Sankey Shangpung kam u kyrtong MDC.
Ya kani ka yalang da pynlai da u Kham Bareh wei da yoh leh yei klam na ki kattu katni ngut ki waheh kam na u Kriñ Dkhar uwa man leh u waheh chnong ka Lumshken, u GS Talang, u Alvin Rymbai wa na ka MLA ka Sutnga Saipung, ka Santa Mary Shylla kiwa da pyrchnag u pynsñiawthooh wei wow kyntu kynpham ya ki paidbah wow yoo jngai ki yei bha i miat ka Constituency ka yong ki deiwa kyrchaan ki ya u Dr. Sankey Shangpung.
Neiliang u Dr. Sankey uwa yieñ kam u kyrtong na ka NPP, da ong u ya ki paidbah wa hanla man u uwa dang khynroo tangwa em u ya itæ i mynsien wow chakri ya ki paidbah, u jied khnang ki da kani ka Party kawa man kawa yahkhmat ya ka sorkar MDA-II khnang wow suk u wanrah ya ka roi ka paar ha kani ka Constituency ka yong oo, kamtæ da kyrpaad u ya ki paidbah waroh wow kyrchaan ki oo ha kani ka kynti.
U Sniawbhalang Dhar, Deputy Chief Minister uwa emlang ha kani ka yalang da e u ka yaroh kawa khroo ya uni u kyrtong wa chlur wow yieñ wow yaleh ya kani ka Election MDC 2025 hanla man u uwa dang khynroo, da ong u wa biang bha pathan wa mih u heipor wa dang khynroo yow yoh u chakri rap bha ya ki paidbah wei rap boon i por wa yoh u yow chakri ya ki paidbah waroh.
Chooh chooh da ong u wa Dr. Sankey Shangpung man u leh u wa stat wei man u leh i sarong wa khroo wa yoh ka 29 Bataw-Lakadong da u bru wa em yei kyrdan Doctor.
Hawa pynkut yei klam da e u i yaroh ya ki paidbah wa wan da ki hajar wow kyrchaan ya uni u kyrtong ka NPP wei i wan yong ki man ko i jop yong ka 29-Bataw Lakadong Constituency.
Discussion about this post