Jowai: Ka Jowai Diocese ynnin ka 20 tarik da thung ko ya u Bishop wa thymme yong ka u Bishop Victor Lyngdoh ha ka yaseiñ wa kyntang wa pynman hei step ha madan Marian, Jowai.
U Bishop Victor da chimkti u kam u Bishop hadien wa khlaad u Bishop wa rim ka Jowai Diocese u Bishop Vincent Gympat.
Ka hukum wow thung ya u Bishop Victor kam u Bishop ka Jowai Diocese da pynmih da u Pope Francis ha ka 15 tarik u Naichiphaw.
Ya i thung ya u Bishop thymme da wan sakhi da ki para wa ngait ka niam na ki 16 parish ka Jowai Diocese, ki MLA, ki MDC wa kiwa mihkhmat leh na kiwa boon ki niam wa ki balang waphær wapær.
U Archbishop Dominic Jala ka Shillong da pynkhamkti u ya u Victor Lyngdoh kam u Bishop wa thymme ka Jowai Diocese hei emlang kiwi de ki Bishop kam u Archbishop Thomas Mennamparampil, Archbishop Dominic Lumon, u Bishop John Thomas, u Bishop Stephan Rotluanga, u Bishop Andrew Marak wa kiwi kiwi de.
U Bishop Victor Lyngdoh da yalap u cha ki paidbah deiwa pynkynmoo ya ki wa hadooh katwon wa da hiar i long i man ki bru heiwa da roi ki kaam sih kam i slaitbor, i lehbeiñ ya ka bei rymmaw, i wiar i maya i burom i akor ha pyrdi para bru kamtæ da phah u ya waroh wow pynthymme noh ya rukom im yong ki.
Ha i sngi won da pynman ya i leh burom ya u Bishop wa thymme da ki rwai ki chaad wa ki klam ya ki mat waphær waphær na ki bru wa pawnaam.
Discussion about this post