Jowai : Ynne ka sngi ka 8 tarik ka Seiñraij Mihmyntdu da pynman ko ya ka Chaad Sukra yong ka ha Madan Wah-Riong heiwa da wan chimbynta da ki spah ngut ki khon na ynñiaw tylli ki dong hapoh ka Mihmyntdu.
Ha kani ka sngi ki ynñiaw dong da mih ki na jar jiar ki dong hei chaad ya rwai heiwa da lai paidbah hadooh wa poi ha madan.
Kini ki ynñiaw dong kynthup ki ya ka Loompyrdi, Loompyrtuh, Loom Chyrmang, Loom Chyrmit, Riatsaliya, Khlieh Myntdu Neiñchnong wa ka Mookynphad.
Ynne ka sngi u MDC ka JHADC u ma Moonlight Pariat da wan sakhi u kam u kongsan ha kani ka Chaad Sukra hei ya emlang ki heh ka Seiñraij Jowai, Tuber wa kiwi kiwi.
Ki khon ki ynñiaw dong da pynyoo ki yei sap chaad yong ki kiwa ha rukom heiwa ki waheh wa khynnah da embynta ki.
Hachwa wow kut, hadien wada kyrpaad ki paidbah da yow elaad yow chaad biang ki yei sur wa bang ha kani ka sngi heiwa ki paidbah dei ka-it mynsien da ku ki hajrong ka thaw chaad wei da chaad ki hadooh wa piah ka tyngkong yong ka.
Hadien ini da lai liwan ki jar jiar ki dong deiwa yachaad wei bood ya ki kari wada pynriam kiwa da rah leh ya ki tanghæng.
Discussion about this post