U Dr. W.R. Kharlukhi, MP Rajya Sabha ha ka 17 tarik uni u Naisan da wan u wow sakhilang ya ka Bamphalar ka Dorbar Chnong Loompyrdi Iongpiah kawa man kawi na ki dong ki chnong wa dang bood dang ksoh ya ka dustur riti wa sikai u warim manchwa longchwa.
Ha ka yalang yahkhmat yong ka miet leh Drama wa ar ka Loompyrdi Iongpiah kawa man hei pynlai u Bimee L. Suwer, Waheh Chnong, da yoh i klam kyrpang chaphang ka yurim yong ka Bamphalar da u C. Tympang Laloo, Asst. Waheh Chnong kamjooh leh i klam wa tbian na uwa thoh yong ka parom u C. Pynsakhiat Yeini Kyndiah wa na u Wansalan E. Dhar, Asst. General Secretary.
U C. Tympang Laloo kam uwi na ki waheh wasian da ong u, nujor ha ki por nachwa yong ki waheh wa da lai wa ki por katni yoo wa kani ka juk ka por da rap yoh suk ko chiboon kamtæ kyrsu kyntu u ya ki khon khynroo khyllood wow man kiwa imsngi u boodlate wei wow pynjanai chooh ya kani ka rukom dustur kamjooh leh ya i miat i bha ka imlang sahlang yong ka chnong ka thaw.
U Dr. W. R. Kharlukhi hawa klam da kynmoo tympang u ya ki Drama wa da yoh u sakhi ha Yungwalieh ka Loompyrdi Iongpiah kam u khynroo yong ki por wa da lai wei dei sñiaw burom leh ya u (T) Wh. Kambel Shullai wa man u u bru wa em i sap hei wow leh u chna iwon iwon iwa phylla heipor leh Drama.
Chooh chooh ong u leh dap u dei sñiawngooh sñiawburom ya ka Loompyrdi Iongpiah neibhah man ko kawi na ki dong kawa kiwa boon walang ki khon ka Ri Jaiñtia yieñtylli ki wow pynskem ya oo kam uwa yahkhmat yong ki khynnah puræ ha ka yalang kawa da pynman ha Yungwalieh yong kani ka dong wei kani toh ka luti kawa pynpoi ya oo chadooh ini i kyrdan iwa em burom kam u MP Rajya Sabha.
Ki ar tylli ki Drama kiwa ka Loompyrdi Iongpiah da yoh ko u pynyoo pyrthai ha kani ka Bamphalar 2025 toh ka “Nei Danda Chei Sakhiat” wa man ka Drama chutia danda wa da thoh da u Daohipaia Toi wa u Marbun Laloo wa kawi wan toh “Ka Lyngkor” wa da thoh wei pyntoh pyntne da u C. Pynsakhiat Yeini Kyndiah.
Ka Dorbar Chnong Loompyrdi Iongpiah e khublei ko ya waroh kiwa da embynta ha ki rukom waphær neibynta i lai bait lai ryntih wei man ka Bamphlar 2025 kawa yoophooh yoophieñ.
Discussion about this post