U MLA yong 3-Raliang Constituency, u Comingone Ymbon kam u kongsan ynne ka sngi da wan wai u ya ki tiar yalehke Taekwondo yong ka West Jaiñtia Hills District Taekwondo Association (WJHDTA) hei emlang u District Sport Officer ka West Jaiñtia Hills District, u K. Passah kam u symbood kongsan.
Ha ka yalang wa tbian wa pynlai da u Franky Shylla kam u Chairman, da yoh yei kyntien pdiang burom na u Richardson Rabon wa man kam u Adviser yong ka Association.
Da yoh i klam wa tbian chaphang i lai luti ka Association na u Secretary yong ka, u Chibaitmi Langstang kamjooh leh da yoh i klam na u Waheh Chnong yong ka Shangpung Pohchnong, u L. Niang katwa i kyntien khublei won da yoh na u Working President ka Association, u Honda-Ohi Papang.
U Khroobok Passah da pynchlur u ya ki khynnah kamjooh leh ya ka Association hei wow yah luti ya ki khynnah yong ka District hi waroh kawi ymtoh du ha iwi i chnong donhi tangwa deiwa sdang cha ki jan chnong leh kamjooh.
U Comingone Ymbon hawa e yei klam da pynchlur u ya ki bei ki pa yong ki khynnah khynroo wow phah lai lehke Sports ya ki khon ki kti khnang wow yoh ki ya i doh i pran wa chait. Heijooh i por leh da yaroh u ya ka Association hei lai luti yong ka heipor wa tbian wa da wanrah ko ya i naam neibynta ka District.
Ha kani ka sngi da pynlait leh ya ki Ticket khle nasib yong ka seiñ.
Neiliang ka Association da e khublei ko ya u kongsan wa da yarap u ya ka hei wow pynbiang ya ki tiar yalehke kamjooh ya u DSO yong ka District.
Heijooh i por da e khublei leh ya ki bei ki pa ki khynnah wa da wan ap wan sñiaw wei kamjoooh wow wan yarap ya ka Association neipor cheipor wei kyrpang da e khublei leh ya ka Dorbar Chnong Shangpung Pohchnong wa da yarap hei wow e ya ka Auditorium wow pynjra ki khynnah ha kani ka yalehke.
