Ka Workshop wa ar sngi hajrong ka ‘Translating Vision into Action NEP 2022: An Implementation Perspective’, wa da pynman da ka Internal Quality Assurance Cell, Shillong College da wan wai ya ka ynne da u montri rangbah ka jylla, u Conrad K Sangma ha Shillong College Auditorium hei emlang u montri ka chnat puræ puthi, u Lakhmen Rymbui wa u Additional Chief Secretary, u DP Wahlang.
Ha kani ka sngi, u Conrad da ong u wa deiwa wanrah ya ka Education Policy wa thymme kani ka Workshop leh daw lai ko ha ka luti kawa biang neibhah i pynkrehkaam ya ka Education Policy emkaam ko yei por wei bor wa i pyllut ha iwa boon ki liang.
Da pynrap u wa ka Education Policy ban joor ko hajrong i thoohbniah (Research), i rukom pyrkhat wa kyrpang, i esikai, i chemphang, ka sports wa kiwi ki kaam wa ym yatoh wa i puræ puthi (Extra Curricular Activities) wei katni kani ka Policy man ko kawa emkaam bha.
Chooh chooh da ong u wa ha kani ka Workshop daw ye u sñiawthooh ya ka thong yong kani ka Policy wei wow chna ka luti krehkaam ym du neibynta ka Shillong College tangwa kiwi ki College leh kamjooh.
Ha kani ka sngi u Conrad wa u Lahkmen Rymbui da wai ki leh ya ka yung thymme kamjooh ka Auditorium chirup wa ka Lift ha Shillong College ya kiwa da chna deiwa yoh poisa na ka RUSA.
