theme-sticky-logo-alt
theme-logo-alt
Advertisement ad1

Beiñ ka BJP Meghalaya yei chah ksoh kiwa kreh ka Party 6 kynta ha ki pulit

Advertisement ad1

Ka State Executive Committee ka Bharatiya Janata Party (BJP) ynne ka sngi da beiñ ko yei chah pyndik kiwa kreh ka Party ha ki pulit.

U BJP State Unit President, u Ernest Mawrie da ong u wa ha ka 26 tarik uni u bnai, u General Secretary ka Tura District, u Wilver M. Danggo wa kiwi da phah hajir ya ki da ki pulit wei da chah ksoh ki 6 kynta.

U Mawrie da pynbaad u wa ki pulit da ksoh hi-eh ki ya kini kiwa kreh ka Party khlem da kylli ya ki iyi iyi leh neibhah toh i kaamram yong ki pulit wow khana yei daw wa chah ksoh ki wei u ksoh kamni dei 6-7 kynta man ko pyrchah ya ka aiñ.

U Mawrie da pyntip u wa da phah leh ya u Danggo wow wan hajir u man-ka-sngi.

Ka State Unit ka BJP daw pynman ko ya leh ya ka yakhih wa jai jai yow pyrchah yeini i chah pyndik kiwa kreh ka Party.

U Ernest Mawrie da kylli u leh yeini waroh khamtam hadien wa da chah kynreh ka Farm House u Vice President ka Party, u Bernard Marak.

U Mawrie da ong u wa ka Farm House kawa tip kam ka Rimpu Bagan toh kawa da krehkaam nadooh u 2019 wei ym jooh em jia iyi iyi tangwa iyi i daw won katni syndet syndet, wei i rukom lai kynreh ym em man ko iwa biang.

Da kdaw u leh wa du kawi ka laad pathai khubor kawa da chah khut yow lai lang wa ki pulit katwa ya kiwi ym em chah khut ki.

Hawa kylli wa lada ka BJP da pyrkhat ko wow dam noh u embynta ha ka Meghalaya Democratic Alliance (MDA), u Mawrie da ong u wa yeini i rai daw leh da ki khlieh dooh ka Party wei da phah leh ya ka Report hajrong ini.

Da ong u leh wa ka Party ym em chna Politics ko ya ini deiwa ong leh heijooh i por iwa yatoh wa u Bernard toh u wan ko na ki pulit ymtoh u Montri Rangbah wow khana ya kiwa thoh khubor uyi wa chah kem neibhah ini toh i kaam ki pulit.

Advertisement ad1
Share this:
Previous

Wan wai u Conrad wa u Lahkmen ya ka Auditorium ka Shillong College

Next

T. 1 lak e yarap u Wailadmiki Shylla cha ka Jaintia Career Coaching Centre