Ka St. Joseph’s Secondary School Nongtalang, ha ka 12 tarik uni u bnai da yoh ko wow wai pyrda ya ka 2nd St. Joseph’s Football Tournament 2021. Ha kani ka samoi ka song poisa yong kani ka Tournament da poi hadooh T. 5 lak wei i thmu yong katai ka Tournament toh chibynta wow pynmih poisa yow pyndap pynbiang ya iwa emkaam ka skur.
Ha ini i wai pyrda ya ka Tournament da emlang u MLA ka Mawphlang Constituency u Eugeneson Lyngdoh uwa da man kam u kongsan, u Assistant Executive Engineer, u Markus Pohsnem kam u symbood kongsan deiwa emlang u Headmaster ka skur St. Joseph’s Secondary School Nongtalang u Anthony Pohrmen, kiwa sikai ka skur deilang wa ki bru waheh wa kiwa paawkhmat ka thaaiñ wa kiwa kitkaam yong ka skur wa kiwi kiwi de.
U Eugeneson kam u kongsan hei klam yong oo da ong u, “I thmu yong ka skur ym man i iwa mihsoh lada ym em i kyrchaan yong phi waroh.” Heijooh i por da e khublei wei e mynsien u ya waroh kiwa yalehke kiwa da chimbynta ha katai ka Tournament.
Da ong u leh wa ha ki yakhun da em bait kiwa jop wa ki warem, tangwa i sap i phong yong phi daw pynyoh ko yei jop. Lyngba i jop daw ye phi u pynpliah chooh chooh wei kamjooh kitu ki wym em yoh yei jop wow nang pyrchang chooh chooh ki.
Da e khublei u leh ya ka chnong Nongtalang waroh kawi deiwa pynkynmoo yei emkaam ka puræ puthi deiwa ong leh wa daw emlang u yow kyrchaan kamwa em ki yei kitkhlieh ya ka thaaiñ wow e mynsien ya ka skur St. Joseph yow nang ye ki wow e chakri chooh chooh ya ka skur wow pynnang pynstat ya ki khynah ka thaaiñ yong ki.
