Ka Wapung Secondary School Wapung, East Jaiñtia Hills District kawa da seiñ da ka dorbar chnong nadooh u snem 1978 hajrong ka yurim u pynku yei puræ puthi ya ki khon ka chnong kamjooh ki chnong wa marjan kiwa wan na ki manyung wa duna i yoh i laa, ha kani ka kynti da yoh ko wow man kam ka Centre thoh Exam SSLC ka MBOSE ka wow sdang nadooh u snem 2025, wei ki skur wa haap hapoh kani ka Centre kynthup ya ka Sohkymphor Secondary School, ka Tia Chaphrang Secondary School Sohkymphor, ka Step By Step Secondary School Wapung, ka Mookhep Secondary School wa kani hi ka skur hi, ka Wapung Secondary School Wapung.
Kamtæ kam ka dak yong i kmen hajrong i yoh Centre, ynne ka sngi, kani ka skur da wai ko ya u moo sahnaam, wei da wan wow wai da u MDC ka thaiñ u Phasmon Dkhar, hei emlang u Aditya Verma, IAS, SDO, Khliehriat, u O. Sumer, SDSEO East Jaiñtia Hills District, ka Melody War napoh ka District Legal Services Authority East Jaiñtia, u Secretary ka SMC, u Gratefulson Siangshai ki khynnah skur, kiwa sikai na ki san tylli ki skur, ki manbei manpa wa kiwi.
U Waheh Chnong ka Wapung Skur, u Postling Dkhar hawa khana yei lai luti ka chnong chirup ka SMC neibynta u yoh ya kani ka Centre, khana u wa i bynta wa duna heiyatoh i chna pynbha pynmiat chwa u pdiang ya kani ka skur kam ka Centre thoh Exam, da pyntoh pynbiang da ka dorbar chnong kamjooh u MDC ka thaaiñ, u Phasmon Dkhar deilang wa u pa yong oo.
U O. Sumer, SDSEO East Jaiñtia Hills District hawa klam kyntu u ya ka Wapung Secondary School wym toh u chim kabu ko ya kiwi ki skur neiwa yoh Centre, tangwa toh u yakrehlang chirup chirup deilang wa kiwi won ki skur leh.
U Aditya Verma IAS, SDO Khliehriat kam u symbood kongsan hawa kyntu kynpham ya ki khynnah skur, ong u, ye phi wow jied iyi kwah phi u man hawa im phi, tangwa iwa emkaam dooh toh u pyrkhat chwa tæ chim yei rai wa biang tam, hadien neitæ won kreh chitom nadooh mynsiem wei chaniah ya idæ, neibhah wym em i dooh næ mahajon wa ye u khanglaad hawa em i thrang i angnood.
Wei kiyi kiyi wa tyngkhooh hei im i, man i iwa emkaam bha khnang yow man kiwa khlan bor wei jop ya ka thong.
U Phasmon Dkhar hawa klam ong u, i yoh ya kani ka Centre u pynsuk ko ya ki skur na ki chnong wa marjan kiwa jooh lai thoh Matric nachwa chadooh Khliehriat wa Tuber, heiwa em i por najrong wa jngai jooh maad ki yei sahkut kari hadooh wa poi slem ki cha ki thaw thoh Exam.
Heiyatoh wei lai luti neibynta u yoh ya kani ka Centre, u Phasmon Dkhar ong u wa em hi i thut i saja tangwa dei embynta lang u Montri ka chnat puræ puthi ka sorkar jylla da ye wow kyrriah yei eh i khoo tæ yoh ya kani ka Centre.
Kamtæ ngait skem u lyngba kani ka Centre daw ye ko u pynmih chiboon ki bru wa stat wow rah naam ya ka District ka jylla ym du hei puræ puthi tangwa ha ki bynta waphær waphær kiwa lai lang chirup chirup wei puræ puthi.
Kiwi won wa klam kynthup ya ka Melody War kawa da chim kabu leh u pynsñiawthooh hajrong ka Juvenile Justice Act, kawa man ka aiñ wa e yada ya ki khynnah wa hapoh 18 snem i rta, kamjooh leh hajrong ka aiñ POCSO, neitæ ka Kyntilang Dkhar, Headmistress Wapung Secondary School wa kiwi.
Ha kani ka sngi, ka skur Wapung Secondary School da pynkup burom haroh ko ya ki 44 ngut ki khynnah wa da Pass ya ka SSLC yong u snem 2024.
Discussion about this post