Ki wakreh ka GHADC hapoh ka lama ka NGEA da beiñ joor ki ya i rukom krehkaam i wym ye u pdiang yong u CEM wa thymme ka GHADC, ym du wym bien u wow su ya ka tulop kawa da sah la 34 bnai wei ynne ka sngi da pynkhyrngiat ko ya ki wakreh ka Council hadien wa u CEM da wanrah bru wakreh u da kiwa na baar.
Ki dkhot ka NGEA kiwa dang pteiñ yei yakhih yong ki wow yoh tulop, da kylli ki wa kammon ha i yung krehkaam sorkar, u CEM da pynman u kam ka yung krehkaam ki bru samen hanla ya oo da jied da ki bru paidbah ym em mut wa ye u leh katwa ngait, wei toh u burom ya ka aiñ ym toh wow wanrah bru wakreh kiwa ym em thung katkam ka aiñ.
Da kam leh wa da sakhi yei sai ya ki kot ki sla napoh ka Council wei da kit ya ki cha ki thaw wym tip iwa da wanrah yei kylli kiyi ki jait kot kiwa da chah sai wei lada ym pynuiñ de ya ki kot ki sla daw dooh lut ya iwa emkaam wa da booh nadooh wa sdang wei kiyi wow kitkhlieh ya ini.
Ka NGEA da thoh ki leh cha ki Branch Manager ka SBI yow pyntip wa ki wakreh ka GHADC pyrchah wei kyntait ki yei kam u CEM wa da pdiang ki wow yoh 5 bnai ka tulop ha i bai tulop warim wei ye u chah pynbor ya ki Bank wow pynlait yabor ka tulop wa 5 bnai.
Wei lada ki Bank pynlait yabor ki ya ka tulop, neiliang ka NEGA da ong ko wa daw lai ko da ka aiñ pyrchah ya ka Bank.
