Ynne ka sngi kawa man ka sngi wa sdang ka Dorbar Mang Tangka ka JHADC, u CEM ka Council, u Thombor Shiwat da wanrah u ya ka Mang Tangka neibynta u 2021-22 kawa duna T. 13.15 Klur na iwa ye u pynmih.
Da ong u wa ha u snem 2020 ka Council wa ka pyrthai waroh kawi da chah ktah ki ha ka khlam COVID-19 iwa da ktah ya i chait i khiah kamjooh leh yei mynsien bru wei iwa da pynbor ya ka Council wow pynduna ko ya ki bru wa wan kreh cha ka 30% hadooh u Khonchonglad 2020 katkam ka hukum ka sorkar.
U Thombor da ong u wa i em ka Lockdown da pynthut i ya ki kreh ha ki Scheme wa ki Project ka sorkar pyrdi wei nadooh wa pyndam ya ka (Lockdown) i kreh da man i iwa lai bait chaaid chaaid khamtam ya i kreh ha ka Additional Office Building.
Da pyntip u wa ka sorkar jylla da pynlait ko leh ya ka bhah yong ka Council na ki Major Mineral kawa man T. 42.48 Klur tam, na ki Minor Mineral T. 7.28 klur, wei na kiwi ki dan yong ki kari (Taxes on Motor Vehicles) won T. 8.57 Klur tam.
Wei lyngba kani ka poisa da ye wow su ya ka tulop ki wakreh kamjooh kiwa da chong-ngiah wa ki MDC hadooh u Naisan 2020 wei da su leh ya ki ram.
Chooh chooh da ong u wa hajrong i eh i khoo na i em ka Lockdown, ka Council da ye ko wow leh ya ki kaam kam ka JHADC Forest Policy wa ki Dak Thoh Pnar,
Ha ka bynta wa kongsan yong i klam u Thombor da ong u wa ka mang tangka neibynta u snem 2021-22, ka poisa wa da yooluti wow pynmih, wow yoh (Estimated Receipts) u man ko T. 173,50,30,000 katwa i pynlut (Estimated Expenditure) won u man i T. 186,65,21,300 iwa mut boon i pynlut ya iwa ye u pynmih da T. 13.15 Klur.
Heijooh i por da pynche u wa joor i pynlut toh wa em i pynku ya ka tulop ki wakreh, i ku dor ki mar (Price escalation) wei ym skem i yoh i la (Revenue Collection) ka Council.
