Ha ka sngi khaddooh yong ka Dorbar Mang Tangka ka JHADC, u MDC ka Saphai Sahsniang Constituency, u Rikut Parieñ da wanrah u ya ka mat yaklam namo ka Motion heiyatoh wow yada wei wow pynkhlan ya ka jaitbru Jaiñtia deiwa tyrwa wow pynkhlan ya ki 3 tylli ki ‘K’.
Da ong u wa ka Sixth Schedule ka Constitution ka ri toh kawa pynkupbor ya ki District Council wow yada ya ki paidbah Ri-loom wei ha Meghalaya em le jaitbru, Khasi, Jaiñtia wa Garo heiwa i bor toh wow chna ya ki aiñ deiwa e nongmuna yeiwa jia ha Tripura wa chah ban beiñ ki jaitbru Ri-loom pynhapoh ka chong ka thaw ki.
Wa nyngkong da ong u wa u ‘K’ mut Ktien heiwa da ong u wa ka jaitbru wa em ka ktien wa skem man ko ka jaitbru wa skem katwa kamtæ emkaam u pynneh ya ka ktien ka thylliej.
Da ong u wa em chiboon i wow pynkylla ya ka AD Rules neibhah hawa baam smai ymye wow smai dei ktien Jaiñtia neibhah heipor wa jop u ynnin snem kam u MDC da kwah da angnood bha u wow smai dei ktien Jaiñtia tangwa ym chah ka aiñ.
Da ong u leh wa ha ka Dorbar da thoh ya ki kylli da i pharæng katwa hawa pynrap kylli (Supplementary) da klam dei Jaiñtia kamtæ emkaam u pynkylla ya ka Section 128 ka AD Rules.
Uwi tawon u ‘K’ toh i khyndaw heiwa da ong u wa ym myntoi wow yoh ya ka spah ka phaw hawa dooh won ya ka khyndaw ka thaw heiwa da ong u wa emkaam u chna ya ka Land Act.
Da kdaw u wa ka Section 41 (e) wa 41 (f) ka Meghalaya Land Transfer Act chah ko ya ki karkhana wow chim wai ya ki thaw wa hadooh 99 hadooh 100 snem iwa man kamwa e kti ya i thaw cha ki.
Sa uwi tawon u ‘K’ da ong u toh Kur heiwa i kam kur kam jait wei i tip ya ki para Kur man iwa emkaam bha ha ka jaitbru yong i. Heiwa emkaam bha u pynkhlan ya ki seiñ kur.
Da ong u wa ki District Council toh wow pynkhlan ki ya ki Dorbar Elaka, Dorbar Raij, Dorbar Chnong kamjooh ki Dorbar Kur.
Discussion about this post