Ynne ka sngi da sdang ka Dorbar Mang Tangka ka JHADC, heiwa u CEM ka Council uwa ksoh leh ya ka chnat Finance da wanrah u ya ka Mang Tangka ka Council yong u snem 2022-23 ka wow pynlut T. 204 klur tam.
Ha u snem mang tangka wa dadep, u 2020-21 ka poisa wa da yoh ka Council man ko T. 76,93,43,524 katwa i pynlut won ha uni u jooh u snem man ko T. 64,31,41,577.
Da pyntip u leh yei sñiawkhia hajrong ka tulop ki MDC, ki wakreh wa kiwa da chong-ngiah heiwa nadooh u Naitung (Apr) 2021 hadooh katni ka poisa wa dang sah wow su toh kamwa T. 80.60 klur wei ka tulop yong u Naitung 2021 dang pynkhreh ya ka.
U Thombor da ong u wa ki MDC neipor cheipor da ban ki ya ka sorkar jylla wow pynlait ya ka bhah yong ka Council neibynta u 2020-2021 heiwa da yoh ko T. 45 klur na ki Major Mineral (mar pohkhyndaw kam u mooyong) katwa kawa sah won man ko T. 18.18 klur. Ka bhah na ki Minor Mineral (kam u chyiap, mooria) wa da yoh ko toh T. 12.83 klur katwa ka Taxes of Motor Vehicle won man ko T. 2.73 klur wei kini da su lut ka sorkar ya ki.
Ka Council, lyngba ka Grant napoh ka 15th Finance Commission wow wanrah ya ki kaam pynroi, da yoh ko T. 13.65 klur.
Heiyatoh won wa ka mang tangka yong uni u snem 2022-23 da antaad wow yoh poisa T. 192,05,16,000 katwa i pynlut u man i T. 204,94,48,300 iwa mut kawa yaphær hadooh kamwa T. 12.89 klur na kawa ye u pynmih. I daw wa yaphær ka poisa toh nei ku ka tulop (Annual Increment), i pynkrehkaam ya ka The Member Pension Act 2018 wa kiwi kiwi.
Ki wakreh hapoh ka Council da duna ki na ki 1462 ngut cha ka 1406 ngut katni.
Heiyatoh waka Iawmusiang, u Thombor da pyntip u wa da yaklam wa ka sorkar jylla heiwa da kyrmen wow yoh ya ka poisa T. 12 klur wow sdang chna biang ya ka.
