Ka Dorbar Mang Tangka ka JHADC da sdang ko ynne ka sngi heiwa u Chief Executive Member (CEM) ka Council, u Thombor Shiwat da wanrah u ya ka Mang Tangka wa Rs. 257.23 klur neibynta u snem 2025-2026.
Hawa e i klam ha ka dorbar, u Thombor da e khublei u ya ki MDC kiwa da chah jied cha kani ka dorbar kam ki MDC deiwa kitbok ya waroh wow kreh ki katkam wa da thrang wei angnood ki paidbah ka Ri-loom Jaiñtia.
Ka Mang Tangka yong u 2025-2026 kawa da antaad wow yoh toh Rs. 245,90,55,900 katwa i pynlut won man i Rs. 257,23,44,200 iwa duna Rs. 11,32,88,300 klur na iwa ye u pynmih.
Da khana u wa ha uni u snem (2024-25) da ye wow pynlait ya ka tulop wa 15 bnai hadien wa pynlait ka sorkar jylla ya ka song poisa ka Council ha u Duyatra (Jan) 2025.
Chooh chooh da khana u wa na ka Digital India Land Records Modernization Programme (DILRMP) ka Council da yoh ko Rs 6,32,400 neibynta u snem 2024-2025.
Na ka Tied & Untied Grant, ka Council da ye ko u pynkrehkaam 422 tylli ki Scheme ha East wa West Jaiñtia Hills wei kini kynthup ki nadooh ka um baam, ki sarok, ki tin sap yung, i kynroh wa kiwi kiwi.
Da yaroh wei e khublei u leh ya ka Executive Committee waroh wa da kreh chitom ko wow ye u pyndep ya ka Jaiñtia Dorbar Hall, ya kawa da wai ha u Naichiphaw (Oct) 2024 hanla em ka Council hei chitom poisa.
U Thombor da khana u leh wa ha ka 28 tarik u Naiynñiaw 2020 da chim ya ka rai wow sangeh i thung kreh heiwa da ye u pynduna na ki 1490 cha ki 1215 ngut donhi katni kiwa kreh.
Da ong u wa ka Executive Committee wa katni u kreh ko katwa ye yei bha i miat khnang wow roi u paar, u bha u miat ki paidbah ka Ri-loom Jaiñtia waroh kawi.
Discussion about this post