Ha ka sngi sdang ka Dorbar Mang Tangka ka JHADC ynne ka sngi, u Madonbai Rymbai, MDC ka Congress na Amwi Khliehtyrshi da takraiñ u ya ka Executive Committee, heiyatoh wa ki le tylli ki Beat Office ka JHADC wa da e kti u pynlai da ki bru samen, deiwa kylli leh wa ha kawon ka rukom u pynmih poisa ya ka Council kawa da maad sakhiat yei kyrdooh poisa.
Wei ileh wa da e kti cha ki bru samen wot hawa em kiwa kreh ka Council kiwa pynlai ya kani ka chnat krehkaam deiwa pynrap leh wa ka District Council ym ye ko mo wow pynlai da ka hi.
U EM In-Charge Forest Department, u Hambertus Nongtdu hawa jubab da ong wa ya kini ki Beat Office da e wai nadooh ka EC warim, wei neiliang yong oo da em u i thmu wow bichaar bniah yow chimkti pynlai biang da ka Council kamwa jooh man.
U Rikut Pareiñ, MDC ka Congress na Saphai Sahsniang da kylli u wa lada yeini i e wai da khut Tender næ pyntip paidbah namo ym em lyngba ki laad pathai khubor, heiwa u EM da jubab u wa hao da pyntip paidbah ha ki ar tylli ki laad pathai khubor.
Discussion about this post