Da: U Soolangki D. Laloo
Kdar ha ki Khad-ar snem nachwa ym ye u mylliñ lyndet wa ynne ka sngi 16 tarik Naiynru man ko ka sngi wow sah kynmoo sah khanatang, ka sngi kawa u lyoh doom i sñiawsih sñiawdiaw ya ka yung ka sem, ya ki khon ka Raij Jowai wa kamjooh ya waroh ki khon ka Ri Le phaw Syiem- Khad-Ar Dolloi wa hapyrdi wa dang dawa i por ka juk wow yoh ka pyrthai u sakhi u yoo yei sap wei chemphang wa sarot kiwa man i kyrkhu wei myntoi ya ka imlang sahlang ieh syndet u Waheh Kambell Chullai yeini i pyrthai chongwasa.
U Waheh Kambell Chullai toh sakhiat U Khai – U Piar ka Ri – ka Jaitbru, uwa da e sap kyrpang u Trekirot heiwa i sap wei chemphang yong o wow pynmih pyrthai ya ka Khnap thangbru (Eco-Friendly Crematorium) man i kyrkhu wei burom wa khroo ya ka ri wa ka jaitbru wei kawa e myntoi leh liang wanang ya ki bru wa pynemkaam ya ka kamjooh yada ko leh yei man i long ka ramaw deiwa lait nei pam i thyllem ya ki dieň kamwa jooh leh ha ki por wa da lai.
Pynchongnia chongyurim yei sap wa kyrpang yong u Waheh Kambell Chullai wow pynmih pyrthai ya ka Khnap Thangbru (Eco-Friendly Crematorium), yoo sakhiat wa man i kyrkhu wa khroo ya ki khon ka Ňiamtre ha kylleiñ ki chnong ki thaw heiwa da pynsuk ya kawi pa kawi ka manyung wow pyndep ya ka niam ka rukom, ka thang ka riñ manda em i haap i oor, i pat rangbah rangsan yong ki khon ka Ňiamtre.
Ha lyndet ini iyi iyi waroh i kyrkhu wa da yoh, man ka khubor wa sñiawsuk u tip wa ha uni u snem ka Seiňraij Ňiamtre Shillong kam ka dak i sñiawngooh makhane ya ki kaam wa sarot u Wh. Kambell Chullai iwa man i burom wei kyrkhu wa khroo ya ka ri waka jaitbru, ynne ka sngi 16 tarik Naiynru 2024 da pynsah kynmoo ko ya ka lyngkhooh snem yap wa 12 u Wh. Kambell deiwa booh yow motdur sah kynmoo heithaw wa em ka Khnap Thangbru (Eco-Friendly Crematorium) ka Seiňraij Ňiamtre Shillong wa em ha Jaiaw, East Khasi Hills District.
Kamwa pynkynmoo yow Waheh Kambell Chullai da kha ha ka 8 tarik Thohlakhmi (February) 1939 wei da ieh u yeini i pyrthai chongwasa ha ka 16 tarik Naiynru (June) 2012, hei lai luti heini ha sla khyndaw pyrthai kam u khynnah, u khynroo, u waheh da leh u chiboon ki kaam kiwa mih nei sap i chemphang wa sarot yong oo kam i chna ya ka Camera Chondur, i chna ya ki rot wa phylla heipor Behdieñkhlam, i pynmih pyrthai ya ka Khnap Thangbru (Eco-Friendly Crematorium) wa kiwi kiwi.
Wh. Kambell Chullai im i pyrtuid i naam yong me.
Chihajar Ngooh wei Sñiaw Makhane.
Discussion about this post