Shillong: U Superintendent of Police (SP) ka East Khasi Hills District, u Sylvester Nongtnger da pyntip u wa ka chnat pulit da yoh pdiang ko yaka FIR na ka Deputy Commissioner pyrchah ya kitu kiwa lai cha ka khawai chongkurim kawa da pynman ha Greenwood Resort ha Khanapara, Assam, tangwa da ujor du ya ki 35 ngut.
Da ong u wa kani ka ujor pyrchah ya ki 35 ngut ki bru kiwa lai cha ka khawai chongkurim toh hajrong i tyngkheiñ ya ki kyndon wa da booh da ka chnat i chait i khiah.
Katkam ka yutip wa da yoh na ka sorkar, da em 41 ngut kiwa lai cha ka khawai chongkurim ha Khanapara, wei neiliang ka sorkar da phah ko ya ka DC yong ka East Khasi Hills, ka Matsiewdor War Nongbri wow ujor pyrchah ya kitai ki bru, tangwa 6 ngut napyrdi kiwa lai cha katai ka khawai ym em chah ujor wei da wiar i pyrtuid ki naka ujor.
U Nongtnger da ong u wa hadien wa da yoh pdiang ya ka FIR, ki pulit da Register ki yaka Case pyrchah ya ki 35 ngut hapoh ka thanat Sadar wei neiliang yong u Investigation Officer (IO) ym pu yoh u wow tohkit neidaw wa kini ki bru dang em ki hapoh ka ‘Home Quarantine’ wa ‘Institutional Quarantine’, deiwa pynrap wa ki pulit u yang ki hadooh wa dep ya ka Quarantine yow lai chakhmat ka takit.
Da ong u wa du wa dep i leh Quarantine yong ki, neiliang ka chnat u phah pyntip (Issue Notice) wow wan mih ki yow e yei pynche.
Ha iwi won i liang, u SP da pyntip u wa ki pulit da dep ki wow pynngat ya kini ki 35 ngut ha kiwa boon ki kyndon, khamtam heiwa tyngkheiñ ya iwa phah yong ka chnat i chait i khiah kawa wanrah yei maa ya ki paaid chong chnong, da pyntip chooh chooh wa ya kitai ki bru da Register Case ha ka Section 188 IPC wa kiwi ki kyndon hapoh ka Disaster Management Act, ka Epidemic Diseases Act kamjooh leh ha ka Meghalaya Epidemic Disease Covid-19 Act, 2020.
Hawa kylli, wa ka sorkar jylla da phah ko wow ujor pyrchah ya ki 41 ngut tangwa kammon won da ujor du yaki 35 ngut, u SP da ong u wa ym em tip u chaphang ini i wym chah ujor ki 6 ngut, tangwa kamwa man hi, ki pulit da yoh ki yaka ujor bait du ya ki 35 ngut.
