Ka Khasi Hills Autonomous District Council (KHADC) da pynsñiaw ko yei sñiawkhia wa em kiwa yut chnong kiwa da poi sahwiar wa wan na Manipur da wiar ki ngeiñ na ka thaw sah wa chipor wa em ha Madanrting, wei da suba wa kini ki bru da lai rieh ki cha kiwi ki chnong Khasi kiwa em hapoh u pood u ang yong ka District Council.
Neiliang u CEM ka KHADC, u Titosstarwell Chyne da lum u ya ki waheh chnong kiwa em soodong ka sor Shillong, heiwa da ya phyllu bniah wym e laad u poi kiwon kiwon wow wan buhai chnong ki ha ki chnong Khasi.
Hawa klam hadien ka yalang, u CEM da khana u wa neiliang u waheh chnong ka Madanrting da pyntip u wa ka dorbar chnong ym tip ko iyi iyi yei wan kini ki bru neibhah da wan ki lyngba kawi ka seiñ niam wei da khana chooh chooh wa katni ki jaitbru Manipur kiwa poiwiar ha katai ka chnong da em ki sa du kamwa 32 yung katwa da ki spah ngut da wiar ki ngeiñ.
Da ong u wa neiliang ka Council da phah ko ya ki waheh chnong wow man ki kiwa paitbniah bha ya ini i wan buhai chnong ki bru kiwa na baar.
U Titos da khana u leh wa ka KHADC da rai ko wow pynmih dei pynbna wa ki dorbar chnong toh u pynpsiah pyrtuid ki ya waroh kiwa wan chongwai ha ki chnong ki thaw wa kynthup ya ki Khasi.
U CEM da khana u leh wa neiliang ki waheh chnong da pynsñiaw ki wa toh u kyntu ya ka sorkar wow chna yei thaw sah wa chipor ya kiwa yut chnong ka Manipur wei wow pyntikna wa ki toh u liwan biang ki cha jar jiar ki chnong hadien wa poi biang ka chongsuk chongsaaiñ hapoh ka jylla Manipur.
Puræ leh: Pynyasuk u DGP hapyrdi ki jaitbru Meitei wa ki Kuki wa im ha Shillong
