U Director General of Police (DGP) ka Meghalaya, u Dr. Lajja Ram Bishnoi da lum u ya ka yalang yong ki jaitbru Meitei wa ki Kuki kiwa chong wa sah ha nongbah Shillong yow pyntikna wa ym mih iwon iwon i kynaad ha Meghalaya, hadien wa da mih i kulmar hapyrdi ki ar jaitbru ha ka jylla Manipur kawa da sdang nadooh ka 3 tarik uni u bnai.
Hawa klam hadien katai ka yalang, u DGP da ong u wa i ya syllok toh yow yada wei wow pynlait na iwon iwon i sñiawthooh bakla hapyrdi kini ki ar jaitbru kiwa chong wa sah ha Shillong wei kamjooh ha kani ka jylla. Da ong u wa ynnin i janmiet ka 4 tarik da em i ya sñiawthooh bakla hapyrdi ki khynroo yong kini ki ar jaitbru iwa da wanrah leh yei yachoh yadat ha ka thaaiñ Nongshiliang wa dang pait da ka Laitumkhrah Police Station.
Da khana u wa ya 16 ngut ki bru kiwa da rah da ki pulit ynnin i miet da pynlait noh hadien wa da sñiawthooh ki yei bakla wei da kular ki wym pynmih ya iwon iwon i kulmar, khamtam hadien wa da chem wa toh i sñiawthooh bakla wa malu mala, kamtæ da ya khublei kti wei da yasuk ki.
Hawa kylli, u DGP da khana u wa ki pulit da paitbniah ki ya ki kattu katni ki thaw ha Shillong wa chong khlehlang ki jaitbru Meitei wa Kuki, kam ha Nongthymmai, Madanrting, Happy Valley, Laitumkhrah wa kiwi ki thaw wa emlang waroh ar jaitbru wei da khana chooh chooh wa ki pulit da yaklam ki leh wa ki bor pynlai ka NEHU yow lait na iwon iwon i jia.
