Da: U Shimphang Lyngdoh
Ri Jaiñtia ka ri wa maya,
Da seiñ da booh da ki longchwa;
Ka ri wa kha ya ka bei u pa,
Ka ri wa pynmih chiboon ki khla.
Yoh u beh ya kiwa choon ki mynder chi sngi,
Dei chat dei kheiñ yoh u mih s’uwi;
Katwa nangchat katwa nangkheiñ,
U sbe da khih klang kylleiñ-kylleiñ.
Syndet syndet da sangeh u sbe,
U khon dap chynrang da wan mih thymme;
Utæ toh U Woh Kiang Nangbah,
Neibynta ka ri d’u rdang da pynchah.
Nadooh itæ i por im i pyrtuid sah i naam,
Hakhmat ka pyrthai da pynyoo mi dei kaam;
Deiwa lenlade deiwa kut yumut,
Ya u mot sahnaam yong me i wow ngooh burom.
Ynne ka sngi wa sah kynmoo tam,
Lyngkhooh sngi yap uwa yalam;
Woh Kiang Nangbah Khlawait ka Ri Loom Jaiñtia,
Da leh warom ya me deiwa chongkun chongkhia.
Woh Kiang Nangbah bru maya jaitbru,
I burom yong me wym ye de u su;
Ya ka Ri Jaiñtia me da ri da chare,
Yei pyrtuid yong me ka pateiñ wow makhane.
