Shillong: I lehbha da ka Bat wa daka bol da ki kynthai ka Meghalaya da pynrem ki yaka Manipur da 54 Run haka yalehke ka Women’s Senior One-Day Trophy ha Puducherry ynne ka sngi.
Ka Meghalaya da phah Bat nyngkong yaka wei da kamai ko 202/7, iwa boon da wan naka 101 Run ka Saee Purandare, wei da ye ki wow khang yaka Manipur da 148/6 na ki 50 Over.
Ka Purandare da dat ko 14 tylli ki 4 Run na 149 bol yow kamai chiteiñ ki Run ka Meghalaya wei da yarap yaka da ki 16 Run na ki 12 bol wa kamai ka Riticia Nongbet yow pynpoi yaka Meghalaya palat yaka 200 Run.
Ka Nongbet daka bol won da pynhaap ko le Wicket deiwa e 20 Run na ki 10 Over. Ka Daiaka Warjri, da yoh ko 2/12 na ki soo Over wa kynthup yaka Wicket ka Ganga, kawa kamai boon dooh yaka Manipur da 41. Ka Debasmita Dutta won da yoh ko 1/36 na ki 7 Over.
Ka Wicket wa yoh khaddooh ka Nongbet da pynpoi ko yaka Manipur da 82/6 tangwa da ye ki wow kamai 66 Run yaka Wicket wa 7 tangwa da lut noh ki Over khlem poi thong ki.
Discussion about this post