Ka Meghalaya da maad biang ko yei rem haka Women’s Senior One Day Trophy da 285 Run pyrchah yaka Delhi ha Chennai ynne ka sngi.
Ka Meghalaya da phah yaka wow kawang bol chwa ko haka yalehke ka Elite Group E hadien wa ka Delhi da jop ko yaka kylla khlem heiwa na ki 50 Over ka Delhi da kamai ko 332/2.
Kawa wai yei kamai Run yaka Delhi ka Shweta Sehrawat da kamai 118 Run chwa u haap ko haka Captain ka Meghalaya ka Debasmita Dutta (1/56). Ka Vandana Chaturvedi (58) da haap ko haka Neelam Roy (1/62).
Kini ki arngut da kamai lang ki 139 Run neibynta ka Wicket wa nyngkong deiwa kamai awjan 7 Run chi Over.
Hanla da pynkylla ya ki kattu katni ngut kiwa yalehka ka Meghalaya, dang chem chitom hi ki da ka Bat deiwa ye u kamai du 47 Run donhi deiwa dooh lut ya waroh ki Wicket.
3 ngut kiwa Bat da yoh ki 9 Run ka Dutta, ka Sanchisa Sangma waka Guest Player ka Rajni Lodhi wei ym em kawi leh wa ye u poi 10 Run.
Ka Meghalaya kattu daw yachem ko waka Tamil Nadu haka 19 tarik.
