Ka World Environment Day, 2023 da lehwarom ya ka ha Shillong ynne ka sngi deiwa pynman ya ki kaam wa har rukom heiwa u Montri Rangbah ka jylla, u Conrad K Sangma da man u kam u kongsan wei da pynkut ya ka ha State Convention Centre.
U Conrad K Sangma hawa e yei klam da ong u wa ka sorkar ha ki snem wa dadep da yaleh ko wow wanrah yei kylla heiyatoh wa ka rymaw deiwa kreh wa kiwi ki chnat sorkar deilang waka imlang sahlang. Da ong u wa kani ka sngi toh kawi na kitæ ki dak wow lai chaphrang wow kreh chirup khnang wow poi cha ka thong. Da ban joor u leh wa ka sorkar hi samen ymye ko wow poi cha ka thong lada ym em i chimbynta da ka imlang sahlang waroh.
Da beiñ joor u leh ya kiwa dai ya ki Plastic kiwa pynemkaam chisien donhi neibhah ya kini ki Plastic da khang da ka sorkar. Da kyntu u leh ya ki paidbah wow dam u pynemkaam kam ki Plastic wei da em ki jait muna wa ki jait Plastic kiwa pyut hadien 90 sngi. Chooh chooh da ong u wa i pynemkaam Plastic wa chisien pynemkaam hi-eh da ki dukan man iwa eh tangwa emkaam wow khang ya kiwa chna wei kiwa dai ya ki.
Heiyatoh wa ka Payment to Ecosystem Services (PES) ha Meghalaya, u Conrad da ong u wa kani man ko kawa phær heiwa ka sorkar kwah ko wow pynheh ha ki por wow wan neibhah da ki hajar Hectare i thaw u em i hapoh kani ka PES wow su ka sorkar ya ki chnong kiwa chimkhia wow yada ya ka rym-aw.
Da ong u wa ka rym-aw embynta bha ko heiyatoh wa i kamai jakpoh neibhah yoh kreh ki bru na i uiñke suwari, i rep wa kiwi kiwi.
U Chief Secretary, u DP Wahlang, da ong u wa i pynkhooid ya ka Wah Umkhrah wa kiwi ki wah ha Shillong dang lai i chaphrang wei emkaam leh wow yada ya ka rymaw.
Ha kani ka sngi da saam leh ya ki Prize cha kiwa jop ha ki yakob waphær waphær kam chibynta yong ka World Environment Day wa pynman ha ki dorbar chnong wa ki seiñ kiwa kynthup ya i pynkhooid ya ki wah, i pynneh ya i khooid i jngiar wa kiwi deiwa e cha ki da ka Meghalaya Excellence Award on Environment Protection, da pynlait u leh ya u NRM Mascot wa i sur rwai ka Natural Resource Management Anthem, i saam ya ki PES Cheque, wa ki Documentary phlim hajrong ka Mission Life, Save Shillong River Campaign, Journey of PES wa kiwi kiwi.
Da pynman leh ya i thung dieñ wa i pakhot ya ki Seed Ball ha SICPAC wei da wai ya ka Nature Interpretation Centre ha Ka Phan Nonglait Park.
Iwa kyrpang dooh ha kani ka sngi World Environment Day 2023 ha jylla toh ki Seed Ball Initiative for Greening of Meghalaya heiwa kini ki Seed Ball da khleh yei khyndaw, ki yutem, wa ki symbe dieñ wa har rukom. Ya kini ki Seed Ball ye u pakhot hi-eh ya ki namo deiwa siat da ka watur kamjooh u lai brait da ki Drones cha ki thaw wa chitom u poi. Kamwa 3.5 million tylli kini ki Seed Balls u saam cha ki khynnah skur ka jylla ha uni u Naiynru ha kylleiñ ka jylla.
