Kam chibynta yong ka World Environment Day ynne ha Shillong, da pynman ya ka yalang ha State Convention Center, Shillong wei ka phang pyrdi yong uni u snem toh “Beat Plastic Pollution” heiwa ha Meghalaya da booh ka phang wa ar ko kawa ong ”Save Shillong’s Rivers.”
Ha kani ka sngi da embynta da ki waheh chnong, ki seiñ kreh monsñiawbha, ki khynnah na ki skur waphær waphær ki sahep sorkar wa u Montri Rangbah ka jylla, u Conrad Sangma.
U Conrad Sangma, da kyntu u ya ki paidbah wow em i bahkhlieh wow yada ya ka rymaw deiwa krehlang wa ka sorkar. Da ong u wa waroh ki bru samen toh u em ki wow yada ya ki dieñ deiwa pynemkaam ya ki kyntien “One Citizen, One Tree” namo uwi u dieñ uwi u bru.
Chooh chooh da pynbna u ya ka Chief Minister’s Solar Mission, ka wow sdang ha ka 7 tarik uni u bnai heiwa hapoh kani ka Scheme waroh ki manyung daw pyndait ya ki Solar Unit heiwa kamni daw yarap i yei dawa bordiñ hapoh ka jylla. Kini ki Solar Unit daw yarap ki leh wow e bordiñ ya ki manyung heiwa ka bordiñ wa tam won u lai ki cha ka Main Grid.
U Chief Secretary ka jylla, u D.P. Wahlang da kdaw u wa iwa eh wa khor ha Meghalaya toh wa em i ya ki wah wa khooid dooh ha pyrthai, tangwa ha Shillong em ki 2 tylli na ki 45 tylli ki wah wa da tngit dooh ha pyrthai kitæ ka Umkhrah waka Umshyrpi. Da khana u leh wa kammon ka Meghalaya da pyrkhat ko wow pynkhai im biang ya ki wah ha Shillong deiwa pynemkaam ya ka GIS Technology wow sorjamin (Mapping) ya ki wah wa ki luti wa kai ki heiwa daw phiah ya ki ha ki Block ki wow pait da ki sahep sorkar wa ki dorbar chnong deilang wa ki seiñ kreh monsñiawbha.
Ha kani ka sngi da saam leh ya ki Prize cha kiwa jop ha ki yakob yong ka Environment Day. Da pynyoo ya ki Documentary kam ka ‘LiFE Mission’, ‘Save Shillong Rivers Campaign’ wa kiwi kiwi.
U Sampath Kumar uwa man u Principal Secretary, Community & Rural Development Department wa kam u Chief Executive Officer (CEO) ka Meghalaya Basin Development Authority, da e u ya ki kyntien lamphang. Da khana u leh ya ki kaam wa da leh da ka jylla wow yada ya ka rymaw kamjooh i eh i khor wa chem na i kylla i suiñ bneiñ (Climate Change). Da yaroh u leh ya ka Payment for Ecosystem Services (PES), kawa da sdang nadooh u Naiynru 2022 da u Montri Rangbah yow yarap poisa cha ki chnong, ki seiñ kur wa kiwi de yow yada ya ka rym-aw wa em ha ki yow pynneh ya ki um ki wah wa ki khloo ki kjam. Da pyntip u wa 17,000 Hectare ki khloo wa da kynjoh lyngba kani ka Scheme hadooh katni, heiwa da booh thong wow yada hadooh 50,000 Hectare ki khloo ha ki san snem wow wan. Ini daw yarap i ya 100 Million Carbon Credit, kawa daw pynmyntoi ya i yoh i laa ka jylla.
Ha kani ka sngi da pynlait leh ya ki Natural Resource Management (NRM) Mascot ki Mai Mai, u Moina wa Pakhnai kamjooh u khla sim (Clouded Leopard).
