U State President ka Youth Front ka National People’s Party, u Kitborlang Nongkrem hawa chimbynta haka kynta yaphyllu yumut yong ka Youth Leaders Conference cum Excellence Arwad for Sportsperson kawa man leh ka yalang yachem lang ki khynroo wa yahkhmat ka NPP Youth Wing 1-Nartiang Constituency haka 16 tarik uni u bnai ha Ummulong, da ong u wym sñiaw yahaap ware u wow ong yei kyntien “Ha ri yong i katwa ngait” neibhah wa hadooh katni ka jylla dang hap chaniah ko ya iwa boon wa emkaam nabaar ka jylla.
I poi klam u ya kini ki kyntien toh hadien i e ymut uwi u khynroo wa lada ka NPP yoh chna sorkar ko samen toh u thooh ko ki laad yaki khon khynroo kammon u yoh khih han lym toh dei khih sorkar leh.
“Nga jooh ong ko yaki khynroo yong i, wow ong lai chaphrang khlur ka ri yahaap hi oo, mait chaphrang khloor ka ri leh yahaap hi oo, tang wow ong won ha ri yong i katwa ngait wym pu em ware sñiaw yahaap oo, i daw hi toh tang kat ka pylleiñ ym pu ye i u pyndap, kiwi wa emkaam i kam i doh syiar, doh masi, doh sniang leh ym ye i u dap pyn da i ya i hi wei wot u khoo leh dang chaniah bait na baar, neitæ i daw wow ong u ha ri yong i katwa ngait dang sñiaw sarom,” ong u Kitborlang Nongkrem.
Da pynkynmoo haroh u wa ha kini ki 5 snem leh embhah wa yoh ya u Montri Rangbah da u Conrad Sangma uwa yoo jngai uwa da wanrah ya ki Scheme waphær waphær kam ka laad pynyoh khih wei wow sikai seiñ khih kam ka PRIME neibynta ki khon khynroo katkam ka sap wa em ki, kamjooh leh ki Scheme e yarap yow pynchlur hei rep i riang.
Wei kamjooh neidaw wa boon i emkaam wa hap chaniah nabaar iwa dapoi hadooh T. 300 klur tam chisnem, neitæ i daw ka sorkar da yaleh bha ko u pynku yei rep wei ri mrad.
Heiyatoh i em ki bru wa jooh pynbaad wa i chna sarok ki MLA toh i myntoi yong ki hi, u Kitborlang jubab u deiwa ong, “Ka sorkar, u Contractor toh kiwa pynkreh donhi tangwa i myntoi u neh ko ya u paidbah la toh ki surok, ki madan yalehke, ki skur wa kiwi.”
Da ong u leh wa i mih kini ki pynbaad yong ki toh wym sñiawthooh ki yei myntoi wa man “Indirect” neibhah ye u man wa rap sñiawsuk ki deiwa yoh bait mar kti.
Chooh chooh da ong u wa i roi i paar, ki sarok ym em chna du kat u pynemkaam ki Contractor næ ka sorkar tangwa kiwi ki Party leh yoh myntoilang hi ki yow pynemkaam lang ki lyngba kam kani ka laad yarap wa man salonsar khlem ñiaw chiliang.
Hajrong ka yukylli yaka thong wa chakhmat ka NPP Youth Front, u Kitborlang ong u wa i em yaka Youth Wing haka Party wym mut du neibynta ka Election tangwa u neh ko waroh 5 snem, wei iwon iwon i dawa ki khynroo haka chong ka thaaiñ ka Constituency toh ka Youth Front wa rap jan cha ka sorkar.
Heijooh i por ong u leh wa i yoo ki khynroo wa kiwa heh yaphær ko, kamtæ ka Youth Front em ko chiboon ki bynta u leh la heiyatoh waka imlang sahlang la toh neibynta ki warep kiwa puræ puthi wa kiwi ki bynta yong ka roi ka paar.
Ya ini i klam u Kitborlang ye phi u pait heini ha wah:
