Hadien wa kiwa chong dukan ha Iewduh da sdang mih ki wow wai ya ki dukan yong ki, wot hapyrdi wa da khang ki bor District neidaw wa pynkrehkaam ya ka Lockdown ha waroh kawi ka jylla wow yada nei poor ka khlam COVID-19, ynne ka sngi ka Deputy Commissioner ka East Khasi Hills, ka Isawanda Laloo da khut yalang ko ya u Syiem ka Hima Mylliem wa u CEM ka KHADC wow pynbait yei man i long waroh.
Hadien ka yalang, ka Deputy Commissioner da ong ko wa kam ki bor pynlai District da yoh ki i ujor ym du na kiwa chong dai madan deiwa pynrap wa ka Lockdown ymye ko u pteiñ bait, wei ka sorkar hadien wa da phyllu yumut ko wa ki bru na ka chnat i chait i khiah, daw ye wow pynyinsur chooh chooh ya ki laad kamai wow yarap ya ki paidbah.
Chooh chooh da ong ko wa kam ka khlieh ka District emkaam u yang hadooh ka 14 tarik, katwa ympu hiar i poor ka khlam ympu ye wow chim ya kawon kawon ka rai iwa daw ye biang wow booh ya ki paidbah ha i maa.
Da ong ko leh wa kamwa man katni i poor ka khlam hapoh ka District man i 19% iwa mut kamwa uwi na ki san ngut kiwa Test da chah ktah u ha u COVID-19, wei da pynrap ko wa katkam i phah ka sorkar pyrdi, du ki District kiwa hiar cha ka 5% kiwa yabi khñiang ye wow pynlait wow man ki kiwa chngaaiñ.
Heijooh i por da ong ko wa ka sorkar daw bichaar biang ko yeini tangwa u wai khlem em i pynbait wa i phyllu yumut daw booh i hei maa ya kiwa boon neibhah chisien wai ya ki yaw, ki paidbah leh daw tooid ki wei kamtæ emkaam wow booh chwa ya ki kyndon.
Heijooh i por ka DC da kyntu ko ya kiwa khih mylla wa kiwa chondai ha yaw wow chim ya i tika COVID-19 heiwa da pyntip ko leh wa ka sorkar hadien wa phyllu yumut wa u CEM ka KHADC wa ka Hima Mylliem daw chim ko ya ka rai wa ha iwon i rukom u pynlai ya ka Iewduh, wei da ong ko leh wa ka sorkar da jied ko ya ki thaw neibynta kiwa chondai madan.
