15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Poor u jait Delta Variant u COVID-19 ha Meghalaya, daw bichaar biang mynstep hajrong ka Lockdown: Conrad

U Montri Rangbah ka jylla, u Conrad Kongal Sangma da ong u wa hadien da chim ya ki nongmuna wow phah pait bniah, da chem wa ka jylla da chah ktah boon ko ha u ‘Delta Variant’ yong u Covid 19, iwa mut wa rap khlan bor wei uwa yabi smat bha ha ka jylla.

Uni u Delta Variant toh iwa da kylla dur wei mih jait thymme u khñiang COVID-19 heiwa u Alpha toh uwa chem nyngkong ha UK, u Beta ha South Africa, Gamma ha Brazil katwa uni u Delta toh uwa da chem nyngkong ha India uwa smat wow poor hadooh 40% hawa nujor wa u jait Alpha katkam wa khana ki bru wa chemphang ha ini i kaam.

U Conrad da ong u leh wa ini i yabi u COVID leh da joor wei poor smat bha cha kiwi ki District ka jylla, khamtam ka West Garo Hills wa West Jaiñtai Hills kiwa yabi kamwa 70 hadooh 80 ngut chi sngi ha kini ki kajiak sngi wa da dep, wei ynne ka sngi da em palat 600 ngut kiwa yabi ya uni u khñiang khlam ha ka jylla, wei da yoo leh wa i yabi u khñiang ym toh de du ha Shillong næ East Khasi Hills, wei da pynrap u wa ka sorkar da pynkhreh won ko ya ki laad yada cha ki thaw nongkyndong.

U Montri Rangbah da ong u wa ka sorkar daw bichaar biang ko mynstep ka sngi hawa yatoh wa i long i man ka jylla na u COVID-19, wei kamwa man katni i long i man phær ko na kawi ka District cha kawi won.

Hajrong i pynyinsur ya i khangsbak, u Conrad da ong u wa ya ini ka sorkar daw chim ko ya ka rai mynstep ka sngi hadien wa da yoh ya ka Report na waroh ki District ha ka jylla, deiwa ong wa ka sorkar kamwa man katni da booh ko hakhmat dooh ya i chait i khiah hanla hap wow pyrkhat ya ka khayi pateiñ.

Hawa yatoh wa i e tika yada na u COVID-19, da pyntip u wa katni ka jylla ka em ko 15,000 tylli ki tika, heiwa da mang 90,000 neibynta kiwa da palat 45 snem ka rta, tangwa neidaw wa i e tika da kynthup lang i ya kitu kiwa nadooh 18 snem, ya ki tika wa da mang neibynta kiwa la 45 snem daw e lang leh cha kiwa da palat 18 snem.

Share this:
Previous

Wow wai ya ki yaw khlem pynbait chwa daw booh ko ha i maa ya ki paidbah: DC

Next

One person one post policy is the need of the hour for the education department