Wow yada ya ka mynried ka khloo Narpuh; pyrchah ka JSU wow pynman Public Hearing ka Star Cement

Ka JSU -Central Body da pyrchah joor ko yei thmu ka sorkar wow pynman biang ya i pynsñiaw paidbah ha ka 30 tarik uni u bnai hajrong wow elaad ya ka M/s Star Cement Meghalaya Ltd. wow sdang ya ka paar moochuni ha Brichynot, East Jaiñtia Hill District.

Ka JSU dadep pyrchah ko ha u snem wa dadep ya ka pynsñiaw paidbah ha Brichynot heiwa kiwa kitkaam wa ki dkhot ka seiñ da mih madan ki ha sarok ryngkat wa ki para seibhalang wa ki paidbah ka Elaka Narpuh wow khanglaad ya ki bor sorkar wow pynman ya kani ka pynsñiaw paidbah kawa da thmu wow pynman ha ka 19 Naikhynde 2019.

Ka seiñ da pyrchah ko yeini neidaw wa ini i thaw (paar moochuni) jan bha i wa ka  Narpuh Wildlife Sanctuary kawa  jngai du kamwa 1 kilometer chiteiñ wei em ko leh ha chrooh ka Eco Sensitive Zone (ECZ) yong ka Sanctuary heiwa i jngai man i du kamwa 0. 25 Km.

U President ka seiñ u Lawyerson War, da ong u wa kam ka seiñ dap ko dei sñiawsih wei yieñ pyrchah ko hajrong ini i leh embor ka sorkar wa thmu wow pynjæd ya ka rymaw deiwa ebor ya kini ki karkhana kiwa pynjæd ya ki khloo khlem pyrkhat de ya ki mrad ki dieñ kiwa em ha kani ka Wildlife Sanctuary namo ka khloo kawa da booh kyrpang ha kani ka thaaiñ wei i em kini ki paar daw ktah ki leh ya ka wah Lukha waka wah Lunar.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka seiñ da beiñ joor ko leh ya ka sorkar MDA neibhah waroh yoo wei tip ki wa u montri rangbah da smai u ha ka 2 Naichiphaw 2019 ha khmat ki paidbah wa ki khynnah puræ deiwa ong “Ymtoh u pynjæd ya ka rymaw wei toh u yada ya ka wei wow burom leh ya ka”.

Tangwa i elaad ka sorkar ya ka Star Cement wow pynman paar ya kani ka thaw ha Brichyrnot pynyoo ko wa kani ka sorkar leh arsap ko ya ki paidbah ka jylla wa ka thaaiñ Narpuh waroh kawi neibhah wa kani ka thaw man ko kawa kyrpang wow yada ya ka nei chah pynjæd ha ki bru pyrthai.

Ka seiñ JSU da pynche ko leh wa kyrchaan ko ya ki 6 chnong yong ka Elaka Narpuh kiwa da yieñ skem hajrong ka yurim wow pyrchah joor ya i leh embor ka sorkar wow pynjæd ya ka Narpuh Wildlife Sanctuary wa ya ka wah Lukha kawa man ka wah kawa da chah ktah chwa na ki bih wa kai na ki karkhana khyndawbilat waphær waphær.

Chooh chooh ka seiñ da ekhublei ko leh ya ki paidbah ka Elaka Narpuh wa da yieñ skem ki wow pyrchah ya i e ka sorkar ya kam ini i thaw wow tih moochuni cha ka Star Cement wei ka seiñ da ekhublei ko ya ki paidbah ka thaaiñ Narpuh kiwa da em sakhiat i kitkhlieh wow yada ya kani ka thaaiñ nei chah pynjæd ka rymaw neibynta ka mynried wa ka pateiñ kawa daw wan.