U Montri warim ka jylla uwa man u MLA ka Khliehriat, u Kyrmen Shylla da ong u wa ki khon khynroo khyllood ka East Jaiñtia nadooh wa khang tih mooyong ha u snem 2014, boon da mih ki cha baar yong ka jylla yow lai mylla wei boonsien da chah chim kabu ki hawa em ki jngai na yung.
Hawa klam wa kiwa thoh khubor, u Kyrmen Shylla da ong u wa chwa yong u snem 2014 ka thaaiñ East Jaiñtia toh kawa pahooh ha ki kaam ki jaam neibhah wa dang yoh u tih mooyong tangwa ki pli kattu la 12 snem da yang wei hei kut laad da lai thooh thaw kreh mylla ki cha kiwi ki thaw.
Neitæ ong u leh wa deiwa em kyrmen wow yoh mylla, em leh napyrdi yong ki kiwa da chim kabu wei chah thok ha ki bru manda poi cha kitu ki thaw wa da kular wow e kaam næ wow mylla. Da ong u leh wa ymtoh wa kwah ki wow lai mylla cha baar jylla næ cha kiwi ki thaw tangwa ym yohsa de ki.
Heijooh i por da ong u wa ki khynroo khyllood ka thaaiñ toh u man ki kiwa syndong manda poi cha ki thaw kreh khnang wa ki bru wa chim kabu ym yoh ki wow pyn-ngop ya ki.
Chooh chooh ong u wa ha kawi ka liang ki khon khynroo toh u mih ki cha baar ka jylla yow yoo yow sakhi da idæ yei long i man khamtam wow thooh kreh da kiwa yatoh wa ka kyrdan wa stat yong ki.
Da ong u wa lada em kiwa da biang wow lai kreh cha baar, man i iwa biang neibhah ka sorkar leh pynchlur ko yeini wot wow lai cha baar ri. Wei hawa lai ki bha u pyntip cha ki bor sorkar kam cha ki Deputy Commissioner næ SP ha jar jiar ki District hawa em kam kitæ kiwa khut wei phah wan kreh ki. Lada em kiwon kiwon kiwa khut deiwa yatohlok wow wan kreh khlem da em ki kot ki sla næ i pynsakhiat wa toh kiwa kreh ha kitæ ki thaw, toh u man kiwa husiar.
U Kyrmen da kyntu joor u ya ki khynroo khyllood lada em kiwon kiwon ki laad yoh kaam cha baar, toh u pyntikna chwa wei wow pyntip leh cha ki bor sorkar khnang wow lait nei chah thok wa i chah chim kabu.
Discussion about this post