Wym bien ka sorkar u klam che lada u su yei hok kiwa kreh Muster Roll, pynbna pynman dorbar bah ha Shillong

Neidaw wa ka sorkar jylla ym em e pynche ko dei thoh hajrong i sangeh su ko ya ka Floor Rate wa VDA cha kiwa kreh Muster Roll nadooh ka 1 tarik u October 2025, wot hawa dadep paan pynche ki na u Commissioner Secretary ka chnat Finance wa na u Montri Rangbah ka sorkar jylla, kamtæ ynne ka sngi ka seiñ All Jaiñtia Muster Roll Worker and Labour Union ha ka yalang chong pyrkhat ha yungwalieh ka Chilliangraij Jowai da rai ki wow khut pynman da ka dorbar bah ha ka 22 tarik uni u bnai ha madan Malki, Shillong heiwa waroh kiwa kreh Muster Roll yong ka jylla na ki District waphær waphær u wan chimbynta lang ki wow yaklam hajrong kani ka mat.

Hadien ka yalang wa da emlang ki dkhot yahkhmat Unit ka AJMR&LU na ki Block waphær waphær, neiliang uwa e buit ka seiñ, u Khroo Lamsalanki Pariat, ong u ka All Jaiñtia Muster Roll Worker and Labour Union kawa kynthup ya kiwa kreh Muster Roll ka jylla Meghalaya toh kawa da sdang krehkaam nadooh u snem 2017.

Ong u da yaklam ki wa ka sorkar yow pynku chisien 5 snem ya ka Floor Rate katwa ya ka VDA toh u pynku ar sien chi snem katkam ka aiñ Minimum Wages Act 1948.

Yeini ong u da yakhun ki nadooh u snem 2017-2018 hadooh wa poi u pood wow chah thngan ki yow yoh yei hok.

Tangwa katni won yong u snem 2025 ka sorkar ym em de su ko nadooh ka 1 tarik October 2025.

Wei heiyatoh weini khana u wa da paan pynche ki na u Commissioner Secretary ka Finance wa na u Montri Rangbah ka sorkar jylla wa lada daw pynkrehkaam ki namo ym pynkreh de ya kani ka Floor Rate kawa toh u pynku wei wow su cha kiwa kreh Muster Roll.

Related posts

Lai sylli ka PAC yei pynkrehkaam ya ka MHIS ha ki thaw sumaar

November 17, 2025

Yarap u Sniawbhalang wow pynsuk ya ki warep ka Tyrshang

November 17, 2025

Chooh chooh khana u wa hei yaklam yong ki wa u Labour Commissioner da jubab ktien hi-eh u deiwa ong wa neidaw wa chem ka sorkar wym em ku dor ki marbaam mardih tangwa hei thooh bniah ki dkhot kiwa kreh Muster Roll ha waroh ki District ka jylla won chem ki i dor marbaam man ki kiwa syad hi.

Kamtæ ong u neidaw i leh wym bna ka sorkar u su ya ka Floor Rate wa VDA wei na i daw wym bien ko u e pynche leh dei thoh, da rai ki wow pynman da ka dorbar bah ha ka 22 tarik ha madan Malki ha Shillong ka wow sdang nadooh i por 10:00 waje i step.

Wei kyrpaad haroh u ya waroh kiwa kreh Muster Roll na kylleiñ ki District ka jylla wa kynthup nadooh Garo, Khasi wa Jaiñtia Hills wow ya wan chimbynta chitrhem ha katai ka dorbar.