Ka Ministry of Civil Aviation da phah ko ya ka IndiGo Airlines wow pynuiñ ya ka poisa hapoh ka 7 tarik uni u bnai cha kiwa chah ktah nei pyndam wei pynslem ya ki lieñsuiñ ha ki sngi wa dadep.
Ka Ministry da phah ko wow pynuiñ ya ka poisa hapoh ka 8:00 waje ka 7 tarik kawa man ka sngi Bibar.
Da phah leh ya ka IndiGo wym toh u chim poisa tam ko na ki paidbah wei lada ym bood yeini daw pynchitom ya ka.
Kam wow kdaw heini kiwa lai luti da ka IndiGo hadooh ynne ka sngi da chah ktah bha ki nei pyndam ya palat 500 tylli ki lieñsuiñ wei kiwa boon dooh toh ha Kempegowda International Airport ka Bengaluru.
Ka sorkar da chimkhia ko leh ya waroh ki liang heiwa da pait ko leh wym em kiwi tawon ki Airlines kiwa chim kabu wow pynku dor ya ka bai lieñsuiñ hadien wa thut i kreh ka IndiGo.
Neiliang ka IndiGo leh da paan maap ko na ki paidbah hajrong ini waroh.
Kiwa boon ki bru da phylla ki wa kammon da jia syndet kamni, tangwa katkam wa ong u Aviation Expert, u Subhash Goyal wa kam chibynta wow pynman yei lai luti da ki lieñsuiñ iwa chngaaiñ yow lait i em i bakla ki bru wa pynlai ka, kamtæ neiliang ki Pilot da dawa ki wow yoh por u thiah u dem deiwa hun ki wei wow bood leh ki kyndon wa da leh ha ka pyrthai.
Kamtæ ka DGCA da pynmih ko ya ki hukum thymme deiwa bood leh ya ka hukum ka yung bichaar heiwa da phah ya waroh kiwa pynlai lieñsuiñ (Airlines) iwa dadap chi snem nachwa yow e por yow pynboon bru wakreh deiwa thung ya kiwa thymme (Staff & Pilot).
Da ong u leh wa kiwi ki Airline kam ka Akasa, SpiceJet, Air India wa Air India Express da leh ki yeini tangwa ka IndiGo ym em leh ko yeini wei da pynboon pathan ko ya ki thaw wa hær ko hapoh ri kamjooh cha baar ri.
Wei mar ya pynkrehkaam ka sorkar ya ki kyndon wa thymme, ka IndiGo heithaw wow pynduna ya ki lieñsuiñ wa hær, da pyndam syndon ko ya kiwa boon wow hær ki iwa da ktah ya ki paidbah.
Discussion about this post