Hadien wa da kut ka yalang Awareness Programme on Waste Segregation and Distribution of Household Blue Bins and Green Bins kawa pynman da ka Jowai Municipal Board ha Ladthadlaboh, Jowai ynne ka sngi. Ka Synjuk Waheh Chnong Jowai da lai yachem won ko ya u Deputy Commissioner, West Jaiñtia Hills District, u Garod LSN Dykes, heiyatoh wa i tngit i tngar yong ka Wah Myntdu wa kiwi ki mat emkaam hapoh ka chnong Jowai kiwa rap jhan.
Ya ini i yachem da yahkhmat da u President ka Synjuk, u Alan Niangti chirup u General Secretary, u Riquoma Rq. Laloo, u D.H. Pde, Treasurer ka Synjuk heiwa da sdang u kylli yei wymem u krehkaam ka Section 144 wa da pynmih heiyatoh wa ki khloh moo khloh chyiap ha Wah Myntdu heijooh ipor i pyntooid khyndaw cha ka.
Neiliang u DC da ong u wa emkaam u ya pait bniah bha, yoh u chondur tæ ujor won khnang yoh u ye u leh yeiwa emkaam. Da kyntu joor u na ka Synjuk watoh u leh iyi iyi heiyatoh weini, yoh u thngaad kiwa yaleh pyrchah yow ye u leh yeiwa emkaam, u DC da ong u leh wow chimkhia yeini neini chakhmat.
Hei yatoh won wa ka Yingkieñ naar na skur St. Mary Mazzerello cha Marian Hills HSS kawa booh hei maa ya kiwa lai wa wan neibhah wa dasih da sarang bha ko, ka Synjuk da kyrpaad ko ya u Deputy Commissioner wow sñiawbha u pyndooh noh ka, ya em pathan i jia wa sñiawsih hadien habood, neiliang u DC leh da ong u wa da yaleh hi u thoohlad yeini, katwa toh wa man ko ka luti wa kongsan yei lai i wan ki paidbah, dang pait kammon u leh yoh u ye u pynsmat yeini.
Neiliang ka Synjuk da pynkynmoo ko yeiwa emkaam i che u chrot wa em bordiñ hajan yung krehkaam u DC ha Iawmusiang, iwa man iwi i bynta wa yoosuk ya ka chnong Jowai wei yeini leh da ong u wa dang hawa thoohlaad wow yoh ya ki bru wow kreh, da kular u wow yaleh chitom hi u pynsmat yeini.
Ka Synjuk da e khublei ko ya u Deputy Commissioner, yei yakrehlang u wa ka Synjuk na ki por cha ki por deiwa yooluti wa sam chakhmat ki kaam u man ki wow yakrehlang chooh chooh neibynta ka chnong Jowai hi waroh kawi.
Da e khublei ko leh ya u MLA, u Wailadmiki Shylla uwa da saam sñiawbha ya ki Borti Noh Jhep cha waroh ki thlu yung hapoh ka chnong Jowai lyngba ki Waheh Chnong yong ki, deiwa kyntu leh ya ki manyung wow pynemkaam tikna ya kini ki Borti katkam i kwah ka Jowai Municipal Board, neibynta wow suk wei wow pynmiat pynbha næ u pynlait yei sma i tung ka chnong Jowai.
Heijooh i por ka Synjuk da e khublei ko leh ya ka Jowai Municipal Board wa da yaleh chitom ko na ki por cha ki por u pyndep ya ki kaam lyngba kiwa kreh yong ka, khamtam heipor wa joor ka khlam COVID-19.
Ka synjuk da khut ko leh yei yakrehlang yong waroh kiwa wan wa lai, kiwa sah wachong ha ka chnong Jowai, wow man ki, kiwa tip yei “Khooid i Pliah toh i wa Kordor tam hei Manbru” dei wymhoi u noh khiar ki kat chawa yoh ya kiwon kiwon ki jakhlia jakhlait wamih na ki.
