Napyrdi ki ar ngut ki khynnah puræ ka Ri-loom Jaiñtia kiwa da yoh u psiah haka thup Top-10 yong ka Result HSSLC Arts Stream kawa da pynbna da ka MBOSE ynne ka sngi, da kynthup ya u Fredrique Gweneth Ryngkhlem uwa da yoh hei kyrdan 7th Position na ka North Liberty Higher Secondary School, Jowai wa ka Monkynjailin Syngkon kawa da yoh hei kyrdan 10th Position na ka St. Dominic’s Higher Secondary School, Mowkyndeng, da pynsñiaw ki yei kmen hajrong ka Result wa da yoh ki neibhah wym em poi pyrkhat ki u poi hadooh kani ka kyrdan.
Hei yaklam wa u Fredrique Gweneth Ryngkhlem, da ong u wym emkaam ware u khreh kot boon kynta tangwa emkaam u e hi-eh yeiwa pura wei pynlai yumut hawa khreh kot najrong wow chah chkoor bha yei batai kiwa sikai.
Ka Monkynjailin Syngkon da ong ko wym toh u pynlut por ware du hei khreh kot tangwa toh u chimbynta leh ha kiwon kiwon ki yakob cha baar ki soo kynroh ka skur khnang yow yiar i bor pyrkhat wei stat chemphang najrong wow kreh chitom khnang yow poi cha ka thong.
Khana ko leh wa heiwa sdang mar ya pyndep Class-X da lai puræ ko da ka Science dei thmu u yakhun NEET, tangwa manda chong Class-XII sñiawthooh ko wa ma lai bait ko chakhmat leh wym ye tang ko u lehbha næ u poi cha ka thong wa thmu, kamtæ da liwan biang ko cha ka skur warim ka St. Dominic’s wei sdang noh ko da ka Arts kamtæ ha uni u snem da yoh ko u khait ya u soh i jop.
Da pynkut ko yei klam deiwa pynkynmoo yei ktien imsngi yong ka naka dkhot Bible kawa ong “Nga ye ko ya kiyi kiyi waroh ha utæ wa e bor ya nga” wei haka hi leh chem ko wa man kamtæ, wa nyngkong dooh deiwa kynmoo yow Blai te ye ko u lehbha bait ha iwon iwon i kaam wa ka leh ko.
Neiliang u Principal ka North Liberty, u Richard Uriah wa u Principal ka St. Dominic’s, u Fr. Richard Louis Rapthap wa kiwa sikai leh pynsñiaw ki yei kmen hajrong kani ka naam ka burom wa ki skur yong ki yoh ko.
Discussion about this post