Kat dang mih ki sngi neiliang ka sorkar jylla wa ki bor District ka West Jaiñtia Hills da sdang pynyinsur biang ki ya ki kyndon heiwa da chah biang ya ki yaw ki haat u wai ki jar jiar ka pali yong ki wei da mih leh i awri awra wa i kulmar heiyatoh wa kiwa chongdai madan, kiwa dai ya ki jhoor wa ki soh khamtam ha Iawmusiang kawa man kawi na ki yaw wa heh dooh hapoh Ri-loom Jaiñtia.
Ynne i sngi da sakhi wa kiwa chongdai madan da chong chwa ki ha tymbud ki luti lai-kjat (Footpath) ka Iawmusiang, Jowai wei hadien ini neiliang ki bor ka Dorbar Chnong Tympang Iawmusiang da phah kyrriah noh ki ya kiwa chongdai na ini i thaw (Footpath) neidaw wa da khynñia ware wei da thut leh i lai i wan ki paidbah tangwa kiwa chongdai nei wym yohsa da pteiñ bait ki wow chong ha i thaw wa da phlai chwa ki ya ki tiar wa wan dai ki ha kini ki luti lai-kjat.
Yeini i wym kyrriah kiwa chongdai na kini ki thaw da ong ki wa da ki bnai ymyoh de ki wow lai dai ya ki mar yong ki khamtam ki mar wa thung wa rep ki wei lada ymye u dai kam ha kini ki sngi, kini ki mar kam ki jhoor wa ki soh daw sepai daw py’ut lut ki.
Hachwa ini waroh kiwa kitkaam ka Dorbar Chnong Tympang Iawmusiang wa ka Synjuk ki Waheh Chnong dei mynsien wa sñiawkhia yei chait i khiah kiwa boon walang ki paidbah wa lai yaw, da lai yachem ki ya u Deputy Commissioner ka District wow kyntu ya u oo wow thooh ya ki laad wow yoh ya i thaw wa biang neibynta kiwa chongdai madan yow lait ki u chong ha i thaw wa da chong ki.
Heiyatoh wa ini waroh neiliang u Assistant Waheh Chnong ka Iawmusiang, u Latu Nartiang da kyntu u leh ya kiwa chongdai wymtoh u chong ki ha ki luti lai-kjat deiwa kyntu leh ya ki seiñbhalang wa kiwi kiwi wow krehlang ki wow thooh laad kammon wow yarap ya ki.
Hadien kattu katni por ki bor chnong da phah noh ki ya kiwa chongdai ha luti lai-kjat wow tia noh cha kyndian sarok khnang wow kyllooid i lai i wan ki bru.
Hajrong ini i kyntu wow tia noh wow chongdai ha kyndian sarok, neiliang u Waheh Chnong, u E. Shylla da ong u wa neiliang ka Dorbar Chnong dei mynsien wa khia da chim noh ko ya ka rai wow kyntu ya kiwa chongdai wow tia ki chaphrang deiwa chong noh ha kyndian sarok khnang wow lait luti ki bru wow lai na kini ki luti lai-kjat wei ini leh u man i kam ka dak wa ka sorkar wow thooh ki thaw neibynta yong kiwa chongdai madan kam ha ini i por.
Mar ya mih ini i kyntu neiliang kiwa chongdai leh da tia ki chaphrang kamwa da kyntu ki bor chnong.
